Mơnuih ƀôn sang hơmâo lăi pơthâo kơ Khua git gai pơ ala mơnuih ƀôn sang dêh čar ơi Trần Thanh Mẫn hăng ƀing khua pơ ala mơnuih ƀôn sang tơring čar Hậu Giang lu bruă bơdjơ̆ nao hơdră djru hră pơhlôm nua ia jrao, hră pơhlôm nua mơnuih mơnam; hơdră yua lŏn mơnai, duh glăi lŏn man pơdong plơi pla phrâo, hơdrôm hră, hơdră djru brơi ƀing nai sang hră čơđai muai; bruă pơgăn hưp ƀong kông ngăn mơng Ping gah…Hiăp bit hăng mơnuih ƀôn sang, Khua git gai pơ ala mơnuih ƀôn sang dêh čar ơi Trần Thanh Mẫn lăi pơthâo kơ bruă pơđĭ kyar bơwih ƀong huă-mơnuih mơnam mơng dêh čar ta; hơdôm anŏ gal hăng tơlơi tơnap tap hrŏm amăng dêh čar hăng jar kmar.

Khua git gai pơ ala mơnuih ƀôn sang dêh čar ơi Trần Thanh Mẫn lăi pơtong, ƀơi anăp kơ tơlơi anai, Ƀirô Khua pơ ala mơnuih ƀôn sang dêh čar glăk pơplih tơlơi pơmĭn, bruă čih pơkra tơlơi phiăn tui jơlan gah tañ ĕp ƀuh hơdôm anŏ aka ƀu klă, tơlơi tơnap tap kiăng pơkra ming tơlơi phiăn, tơlơi pơtrun. Yua anun, bruă čih pơkra tơlơi phiăn kiăng mơng tơlơi sit nik, lăng tui tơlơi găn rơgao, lăng mơnuih ƀôn sang hăng anom bơwih ƀong sĭ mơdrô lĕ phun, hmao tlôn pơsir hĭ tơnap tap.