Mơguah tom brơi (21/11), hmư̆ tui tơlơi jak iâo mơ̆ng Khua dêh čar Malaysia, Khua git gai Ping gah dêh čar ơi Tô Lâm hăng Bơnai ñu hrŏm hăng grŭp khua pơ ala gưl dlông dêh čar ta nao truh laih pơ̆ plơi prong jưh jom Kuala Lumbur, pơphun tal nao čuă sit nik dêh čar Malaysia. Tơdơi kơ mông ngă lơphet čơkă jum sit nik dưi pơphun yôm phăn ƀơi Anih mă bruă Khua dêh čar Malaysia pơ̆ plơi prong jưh jom Kuala Lumbur, Khua git gai Ping gah dêh čar ơi Tô Lâm hmâo bơkơtuai laih hăng Khua dêh čar Malaysia.

Amăng mông bơkơtuai, dua gơñu lăi pơthâo nao rai kơ tơlơi rim dêh čar, nao dơlăm lăi pơthâo nao rai hăng črông lô hơdôm jơlan pơsir kơtưn pơtrut đĭ hloh dong gum hrŏm kơplah wah dua bôh dêh čar amăng abih bang hơdôm bruă jai hrơi jai pơđĭ kyar kơtang, abih bang hăng ba glăi bôh tơhnal hloh pơ̆ anăp anai. Việt Nam čang rơmang hrŏm hăng Malaysia ngă brơi tơlơi rô nao rai đăo kơnang hăng gum hrŏm ba glăi bôh tơhnal kơplah wah dua bôh dêh čar hơdai nao rơwang phrâo ƀơi rơnoh dlông, sit nik hloh dong, djơ̆ tui hơdôm tơlơi rơkâo pơđĭ kyar mơ̆ng 2 bôh dêh čar amăng rơwang phrâo; ngă klă hăng hmâo bruă gơgrong hrŏm Malaysia hăng hơdôm bôh dêh čar ASEAN pơjing khul ASEAN gum hrŏm hơbit, kơjăp kơtang./.