Amăng rơwang nao čuă dêh čar Malaysia, čơtlăm lơ 21/11, Khua git gai Ping gah dêh čar ta ơi Tô Lâm hăng Khua dêh čar Malaysia Anwar Ibrahim gum hrŏm git gai jơnum hăng mơnuih mă tơlơi pơhing phrâo kơ bôh tơhnal bruă bơkơtuai. Amăng mông jơnum hăng mơnuih mă tơlơi pơhing phrâo, Khua git gai Ping gah dêh čar ta ơi Tô Lâm hăng Khua dêh čar Malaysia brơi thâo, 2 bôh dêh čar hmâo pơsit laih pơđĭ dlông tơlơi rô nao rai Việt Nam hăng Malaysia truh bruă gum hrŏm abih bang.

Mơ̆ng anun, amra djru 2 bôh dêh čar hơkrŭ đĭ dong hăng kơtưn gum hrŏm giăng mah, đăo kơnang bruă kơđi čar kơplah wah dua bôh dêh čar hluai tui pơpŭ tơlơi phiăn jar kơmar, rơngai, dưi pô, pơhlôm lŏn ia hăng bruă kơđi čar, lăp djơ̆ hăng tơlơi bơwih ƀong – mơnuih mơnam hăng tơlơi phiăn, tơlơi pơkă mơ̆ng rim bôh dêh čar hăng tơlơi pơkă ƀu tek rơwek nao amăng bruă gah lăm dêh čar tơdruă. Akô̆ phun mơ̆ng bruă gum hrŏm pơhlôm abih bang hmâo kơtưn pran đăo kơnang hăng gum hrŏm bruă kơđi čar, pơgang lŏn ia, rơnuk rơnua plơi pla, pơjing phun akha tơlơi rô nao rai kơjăp, djru pơgang tơlơi mơ-ak klă, hơđong kơ pơđĭ kyar hluai tui kơtưn pơplih čuă nao rai, gum hrŏm amăng abih bang hơdôm gưl, hơdôm glông; pok pơhai ba glăi bôh tơhnal hơdôm hơdră pơtom hiăp, gum hrŏm hmâo hơđăp, hrŏm hăng anun kơsem min pơjing hơdôm hơdră pơkă phrâo lăp djơ̆ tơlơi kiăng, bôh tŭ yua mơ̆ng dua bơnah amăng rơnuk phrâo./.