Pơ ala kơ khua mua Jơnum min apăn bruă phun pơ ala mơnuih ƀôn sang dêh čar, ơi Trần Thanh Mẫn, Khua git gai pơ ala mơnuih ƀôn sang dêh čar pơdah rai pran jua hơdor tơngia prong prin hăng djop gưl, hnơr, rơnuk khua mua, ƀing nai pơtô hrăm hră lăi hrŏm, ƀing pơ ala mơnuih ƀôn sang dêh čar jing nai pơtô ƀudah khua mua amăng anom bruă pơtô hrăm hnun mơ̆n, hơmâo ngă lu bruă tŭ yua pơtô hrăm pơđĭ kyar.

Ơi Trần Thanh Mẫn lăi pơtong, hăng tơlơi gir run khut khăt, khăp kơ bruă laih anun thâohluh lu mơta bruă mă hơmâo sit nik, ƀing pơ ala mơnuih ƀôn sang dêh čar jing ƀing nai pơtô, khua hơđăp amăng bruă pơtô hrăm, khua mua dŏ ngă bruă wai lăng gah bruă pơtô hrăm hơmâo pơgôp pran jua prong prin kơ bruă čih pơkra tơlơi phiăn, pơsit hrŏm lu bruă mă yom, pơprong čih pơkra tơlơi phiăn dêh čar kơ bruă pơtô hrăm. Khua git gai pơ ala mơnuih ƀôn sang čang rơmang rim čô nai pơtô, amra jing gru bơngač kơ pran jua hiam, tơlơi pơhiăp djơ̆ rơ-ua, gru grua hiam puăi tlao thâo rơhmač mơak, gir run pơsir mă tơlơi tơnap tap, pơyơr abih pran jua mă bruă, glăm ba, khăp kơ bruă, khăp kơ čơđai sang hră; ƀu pơdơi ôh hrăm lu, pơđĭ tui tơlơi thâo thăi amăng bruă pơtô hrăm.