Ƀrô djơ̆ tal mơak hơdor glăi 42 thun hrơi pioh kơ Nai pơtô hrăm hră Việt Nam, mơguah hrơi anai, ƀing pơ ala mơnuih ƀôn sang dêh čar jơnum pơtum amăng sang jơnum prong, pơčrong sai tơlơi phiăn Nai pơtô hrăm hră. Hlâo kơ anun, jơnum tal 1 ƀing pơ ala hơmâo pơčrong sai amăng grup, hơmâo lu khua mua pơ ala rơkâo ming pơkra glăi kiăng hơmâo jơlan hơdră pơtrut pơsur ƀing nai pơtô hrăm hră glăi mă bruă amăng kual mơnuih djuai ƀiă, kual čư̆ siăng, anih bơwih ƀong huă  dŏ tơnap tap, kơƀah lu mơta, khom hơmâo hơdră djru ba lăp djơ̆ kơ ƀing nai pơtô anun.....

Ƀing pơ ala đing nao bruă akŏ pơjing tơlơi pơtrun, pơkă kơ bruă nai pơtô hrăm hră gah sang hră rơngiao kơnuk kơna; ƀing nai pơtô khom hơmâo hrăm djop tơlơi thâo pơkă kơ bruă mă samơ̆ ăt khom ngă djơ̆ anŏ pơkă phara tui hluai gưl hrăm hăng tơlơi thâo hơmâo hrăm bruă. Ƀing khua mua pơčrong tơlơi phiăn Nai pơtô hrăm hră kiăng djru hrŏm čih pơkra jơlan hơdră kơ bruă pơtô bruă ană mơnuih. Či tlam lĕ, ƀing pơ ala hmư̆ hră lăi pơthâo, pơtong glăi tơlơi phiăn čih pơkra pơhrua nao phrâo amăng tơlơi phiăn Bruă mă krăo lăng mơ̆ng ƀing pơ ala mơnuih ƀôn sang dêh čar hăng ƀing pơ ala mơnuih ƀôn sang djop gưl hăng pơčrong sai ƀơi sang jơnum prong tuh pơ alin pơkra jơlan rơdêh treng đuăi hmar mơ̆ng kual Kơdư nao pơ Dơnung; pơkra glăi jơlan hơdră tuh pơ alin man pơkra tơdron rơdêh por jar kmar Long Thành.