Rơwang bruă črăn 4 hmâo abih bang ataih rơbêh kơ 58km, abih bang prăk mă yua 12 rơbâo klai prăk. Mơ̆ng hrơi pok pơhai rơwang bruă truh ră anai hmâo ngă giong laih bruă jao glăi anih anom pioh man pơkra. Amăng hơdôm hrơi rơgao, tơring čar Sóc Trăng hmâo črâo ba ƀing tuh pơplai man pơkra đing nao pok pơhai khut khăt pơhlôm rơnoh man pơkra.

Biă ñu tơring čar hmâo pok pơhai tal bơkơtưn phun “15 hrơi mlăm pơtrut tañ rơnoh bruă pơkra rơwang bruă črăn 4 gah rơwang bruă Tuh pơplai pơkra jơlan đuăi hmar Châu Đôc-Cần Thơ-Sóc Trăng tal 1”. Grŭp wai lăng rơwang bruă 2 hmâo črâo ba anom man pơkra kơtưn mơnuih mă bruă, măi mok pơphun ngă tui “3 ka 4 kíp” mă bruă wot amăng hrơi pơdơi lơphet, pơdơi tết kiăng pơhlôm rơnoh rơwang bruă ngă djơ̆ hơdôm tơhnal pơkă thun blan tui tơlơi rơkâo./.