Pơhiăp amăng mông jơnum tal 44 mơ̆ng Jơnum min apăn bruă Khua pơ ala mơnuih ƀôn sang dêh čar, pok phun amăng mơguah kơ 14/4, Khua git gai pơ ala mơnuih ƀôn sang dêh čar brơi thâo, amra gum hrŏm, pel ĕp, pơsit 42 djuai bôh yôm; pơplih pơkra, pơhrua nao sa dua mơta tơlơi mơ̆ng Phiah phiăn thun 2013; pel ĕp hơdôm tơlơi gah tơlơi dưi kiăng tañ pơtlaih tơnap, tơlơi gun kơ hơdôm bôh anom bơwih ƀong.

Biă ñu, Jơnum min apăn bruă Khua pơ ala mơnuih ƀôn sang dêh čar amra gum pơhiăp kơ hră pơ-ar rơkâo: pơplih pơkra, pơhrua nao sa dua mơta amăng Phiah phiăn thun 2013; akô̆ pơjing Jơnum čih pơplih pơkra, pơhrua nao sa dua mơta tơlơi mơ̆ng Phiah phiăn thun 2013; mă tơlơi gum pơhiăp Mơnuih ƀôn sang kơ čih pơplih pơkra, pơhrua nao sa dua mơta tơlơi amăng Phiah phiăn 2013 amăng rơwang 1 blan. Khua git gai pơ ala mơnuih ƀôn sang dêh čar ơi Trần Thanh Mẫn lăi rơđah, bruă pơplih pơkra Phiah phiăn lĕ bruă jao biă ñu yôm phăn hăng mrô bruă prong biă, bơdjơ̆ nao bruă gơgrong mơ̆ng lu ƀirô, pơphun, nao hrŏm hăng hơdră pơtrun rơbô̆t, dưm dăp glông bruă čar amăng abih bang glông bruă kơđi čar, tui Klah čun mrô 126, 127 mơ̆ng Ding jum kơđi čar hăng Grŭp črâo ba Ping gah dêh čar. Amăng hơdôm hrơi pơphun Tal jơnum, Jơnum min apăn bruă Khua pơ ala mơnuih ƀôn sang dêh čar khom ngă giong bruă pel ĕp, lăng glăi hơdôm tơlơi pơtrun pơsit dưm dăp, pơphun glăi anom bruă čar gưl să; hrŏm hăng anun, gum pơhiăp pioh lăi pơthâo kơ Khua pơ ala mơnuih ƀôn sang pel ĕp tơlơi pơtrun pơsit pơmut hrŏm hơdôm anom bruă čar gưl tơring čar hăng ngă giong hơdôm bôh yôm tui Jơlan hơdră bruă mă 3 blan tal 2 hmâo mă yua laih./.