Đĭ pơhiăp amăng mông jơnum, Khua git gai pơ ala mơnuih ƀôn sang dêh čar ơi Trần Thanh Mẫn lăi pơtong, anai lĕ jơnum tal 2, khul apăn bruă Ping gah Khua pơ ala mơnuih ƀôn sang dêh čar pơgôp hiăp kơ 2 boh tơhnal anai. Tui anun, hơdôm bruă phun, hơmâo ngă rơđah laih, sem lăng sit nik, pơƀuh rơđah amra pơƀut glăi pioh amăng črăn hră lăi pơthâo.

Khua git gai pơ ala mơnuih ƀôn sang dêh čar brơi thâo, tui tơlơi rơkâo mơng Ding jum kơđi čar, bruă mơ-it nao anom bruă gơnong glông kiăng tañ hloh, ječ ameč kiăng lăi pơthâo Ding jum kơđi čar pơgôp hiăp, črâo ba hlâo kơ mơ-it nao Jơnum gơnong glông 11 him lăng mơng akŏ blan 4/2025. Sit biă ñu, tơlơi sit nik, boh tơhnal bruă mă yôm phăn biă mă, bruă mă ăt lu mơn, bơdjơ̆ nao tơlơi gơgrong mơng lu anih anom, khul grup pơlir hăng tơlơi črâo trun dưm dăp, ngă hơbot anih anom mă bruă.