Đĭ pơhiăp pok pơphun mông jơnum lok 4 mơng Jơnum min apăn bruă Khua pơ ala mơnuih ƀon sang mơguah tom brơi kơnôl 8/7, ƀơi Ƀirô mă bruă, Khua git gai pơ ala mơnuih ƀôn sang dêh čar ơi Trần Thanh Mẫn lăi pơtong, tơdah ƀu pơhlôm brơi klă hloh, djơ̆ hrơi mông tui jơlan hơdră mơ̆ Khua ding jum, khua apăn akŏ anom bruă git gai čih pơkra hăng anom bruă git gai pel ĕp kiăng glăm ba ƀơi anăp Kơnuk kơna, Khua dêh čar hăng ƀơi anăp Jơnum min apăn bruă Khua pơ ala mơnuih ƀon sang dêh čar. Khua git gai pơ ala mơnuih ƀôn sang dêh čar rơkâo hăng hơdôm bruă pơprong dŏ hơmâo tơlơi pơmĭn phara, ƀudah hơmâo hơdră bruă phrâo phara hăng tơlơi pơkă amăng tơlơi phiăn ră anai, hơdôm anom bruă kiăng gơgrong gum hrŏm hăng hơdôm anom bruă amăng Ƀirô Khua pơ ala mơnuih ƀon sang dêh čar kiăng hmao tlôn lăi pơthâo gưl glăm ba sem lăng, pơsit brơi; anăm brơi pơkŏng glăi bruă mă amăng rơwang rơnuč amăng rĭm tal jơnum.

Khua git gai pơ ala mơnuih ƀôn sang dêh čar ơi Trần Thanh Mẫn sa wŏt dong lăi pơtong, tơlơi phiăn kiăng nao hrŏm hăng tơlơi pơtrun, tơhnal pơkă amăng hơdôm hơdră bruă mơng Ƀirô Khua pơ ala mơnuih ƀon sang dêh čar amăng rĭm wŏt jơnum kah mơng ba glăi rơnoh yôm hăng tañ mut amăng tơlơi hơdip. Anai ăt lĕ tơlơi mơ̆ mơnuih ƀôn sang hăng anom bơwih ƀong sĭ mơdrô glăk dŏ tơguăn.