Dua bơnah pơtrut tui boh tŭ yua “Tơlơi lăi pơthâo hrŏm kơ bruă ngă dlăm tui hăng pơđĭ tui tơlơi rô nao rai ngă gŏp amăng abih bang bruă, akŏ pơdong kual ngă hrŏm pơđĭ kyar pơ anăp anao kơplah wah Việt Nam - Khač yôm hloh”; pơtrut tui tơlơi gơgrong bruă mơ̆ng Ƀirô pơ ala mơnuih ƀôn sang dêh čar amăng bruă pơtrut tui tơlơi ngă hrŏm dua boh dêh čar. Khua git gai pơ ala mơnuih ƀôn sang dêh čar ơi Vương Đình Huệ kiăng dua bơnah pơtrut tui ngă pơđĭ kyar, pơđĭ tui hloh anŏ klă, tŭ yua amăng djŏp bruă ngă hrŏm. Ơi Vương Đình Huệ čang rơmang dua bơnah akŏ pơjing rup tuh pơ alin phrâo mơ̆ng hơdôm anom bơwih ƀong prong, rơgơi, hmư̆ hing, mă yua măi mok phrâo mơ̆ng dêh čar Khač ƀơi Việt Nam.

Tơdơi kơ pơđut mông jơnum, Khua git gai pơ ala mơnuih ƀôn sang dêh čar ơi Vương Đình Huệ hăng Khua git gai pơ ala mơnuih ƀôn sang dêh čar Khač ơi Triệu Lạc tế kĭ hră ngă hrŏm kơplah wah Ƀirô khua pơ ala mơnuih ƀôn sang dêh čar Việt Nam hăng dêh čar Khač.

Amăng hrơi tom brơi, Khua git gai pơ ala mơnuih ƀôn sang dêh čar ơi Vương Đình Huệ tŭ jum khua mua hơdôm Grup bơwih ƀong prong hloh gah bruă jơlan nao rai, jơlan rơdêh treng, apui lơtrik mơ̆ng dêh čar Khač; nao čuă Anom bruă kơsem min hăng Pơđĭ kyar mơ̆ng Grup bơwih ƀong Huawei.