Tơdơi kơ mông čơkă sit nik, Khua git gai pơ ala mơnuih ƀôn sang dêh čar ơi Vương Đình Huệ pơphun jơnum bơkơtuai hăng Khua git gai pơ ala mơnuih ƀôn sang dêh čar Phần Lan Jussi Halla-aho. Hlâo anun, Khua git gai pơ ala mơnuih ƀôn sang dêh čar Phần Lan Jussi Halla-aho hơmâo nao dưm guang bơnga ƀơi pơsat jĕp Khua mir sir Hồ Chí Minh. Amăng hơdôm hrơi nao čuă, Khua git gai pơ ala mơnuih ƀôn sang dêh čar Phần Lan Jussi Halla-aho amra tŭ jum Khua dêh čar ơi Phạm Minh Chính; bưp Ding kơna Khul git gai Ping gah, Khua khul pơphun bruă gơnong glông yă Trương Thị Mai hăng hơmâo mông pơbưp gah rơngiao dong.

Tal rai čuă mơng Khua git gai pơ ala mơnuih ƀôn sang dêh čar Jussi Halla-aho, Việt Nam čang rơmang pơtrut ƀiă dong ngă hrŏm kơplah wah dua anom bruă čih pơkra tơlơi phiăn, ba bruă ngă hrŏm dua anom bruă jai tŭ yua, sit nik; ngă gêh gal pok prong ngă hrŏm kơplah wah dua bơnah amăng djop mơta bruă, sit biă ñu ba glăi boh tŭ yua ngă hrŏm bơwih ƀong huă kơplah wah dua bơnah; kơtưn hăng hơkrŭ ngă hrŏm amăng hơdôm mông jơnum djop bơnah anun lĕ Sang gum hơbit djop dêh čar, Khul pơ ala mơnuih ƀôn sang rŏng lŏn tơnah.