Tui hăng tơlơi lăi pơthâo mơng Ping gah tơring čar Bình Thuận, thun 2022 hăng 3 blan tal 1 thun anai tơlơi bơwih ƀong mơng tơring čar đĭ kyar glăi tañ laih, dưm kơnar amăng 3 mơta bruă phun: Pơkra măi mok, tuai čuă ngui hăng bruă ngă hmua. Rơnoh đĭ kyar gơnam hơmâo 6,75%. Prăk pơhrui thun hlâo hơmâo 11.300 klai prăk, 3 blan tal 1 thun anai hơmâo rơbêh 2.350 klai prăk.

Khua git gai pơ ala mơnuih ƀon sang dêh čar ta bơni hơ-ơč, tŭ yap hơdôm tơlơi gir run, hơdôm tơlơi hơmâo ngă mơng Ping gah, gong gai, ling tơhan hăng mơnuih ƀon sang tơring čar Bình Thuận; laih dong rơkâo lăng glăi bruă ngă tui tơlơi pơtrun ngă bruă, tơlơi pơtrun mơng Jơnum ping gah dêh čar tal 13, hơdôm tơlơi pơtrun mơng Ping gah, mơng Ƀirô khua pơ ala mơnuih ƀon sang dêh čar, mơng Kơnuk kơna laih anun Tơlơi pơtrun jơnum ping gah tơring čar tal 14. Tơring čar kiăng ngă klă bruă akŏ pơdong Ping gah, akŏ pơdong anom bruă čar, ngă kơjăp tơlơi pơmin pran jua mă bruă mơng ƀing khua, mơnuih ping gah. Anai jing bruă yôm biă mă, kiăng ngă rơđah rơđông, abih bang mơnuih thâo kiăo tui tơlơi pơsit mơng khul grup.