Tal nao čuă sit nik anai hơmâo 40 mơta bruă mă, jơnum bưp nao rai hăng khua mua pơprong laih anun bưp nao rai gah rơngiao mông jơnum ƀơi Bắc Kinh, ƀôn prong Thượng Hải laih anun tơring čar Vân Nam.

Jing khua mua phun apăn bruă pơ ala ping gah, kơnuk kơna, tal nao čuă dêh čar Khač mơ̆ng Khua git gai pơ ala mơnuih ƀôn sang dêh čar ta ơi Vương Đình Huệ ƀu kơnong pơgôp hrŏm tơlơi ngă giăng mah hiam klă plah wah dua bơnah anom bruă čih pơkra tơlơi phiăn dêh čar đôč ôh, dŏ jing bruă mă pơtrut giăng mah dua bơnah ping gah, kơnuk kơna amăng lu bruă ngă hrŏm kơđi čar, pơgang rơnuk rơnua, ngă hrŏm sit nik, tŭ yua boh nik ñu tơlơi bơwih ƀong huă, sĭ mơdrô, tuh pơ alin, pơtrut nao rai bruă čuk pơkra jơlan nao rai, ngă hrŏm lu bơnah, brơi mơnuih ƀôn sang jĕ giăm tơdruă mơak hloh.

Hăng boh tơhnal lu mơta dưi ngă, tŭ yua, tal nao čuă sit nik dêh čar Khač mơ̆ng khua git gai pơ ala mơnuih ƀôn sang dêh čar ơi Vương Đình Huệ ăt jing yak rơbat hiam klă djơ̆ lăp amăng bruă pơtrut ngă pŭ ƀăn dua boh dêh čar, pơdah rai bruă mă djru pran prong prin amăng bruă ngă tui tơlơi phiăn pioh pơtrut pơđĭ kyar rô nao rai dua bơnah ping gah, dua boh dêh čar Việt Nam hăng Khač.