Khua git gai pơ ala mơnuih ƀon sang dêh čar ơi Vương Đình Huệ lăi pơtong, Việt Nam čang rơmang dua bơnah pơtrut sĭ mơdrô hơđong kjăp, bơkơnar, ngă gêh gal brơi bruă blơi mut lu gơnam đang hmua mơng Việt Nam pơ Australia hăng pot glăi. Khua git gai pơ ala mơnuih ƀon sang dêh čar rơkâo Khua gơgrong bruă dêh čar Australia đing nao, pơtrut ngă hrŏm amăng bruă mă, sit biă ñu pok prong ngă hrŏm kơ boh thâo phrâo amăng ngă hmua hăng mơnuih mă bruă; pơtrut tơlơi rô nao rai kơplah wah hơdôm boh ƀon lan mơng dua bơnah.

Khua git gai pơ ala mơnuih ƀon sang dêh čar ơi Vương Đình Huệ bơni Australia hơmâo dong yua Việt Nam ruah ngă ding kơna Khul djru ană mơnuih mơng Sang gum hơbit djop dêh čar rơwang thun 2023-2025, juăt pơlăi nao rai tơlơi pơmĭn hrŏm amăng hơdôm mông jơnum pơƀut amăng kual hăng jar kmar. Khua gơgrong bruă dêh čar David Hurley tŭ ư hăng tơlơi lăi pơthâo mơng Khua pơ ala mơnuih ƀon sang dêh čar kơ sa, dua mơta bruă ngă hrŏm phrâo kơplah wah anom bruă čih pơkra tơlơi phiăn dua bơnah, brơi thâo, anai lĕ hơdôm bruă akŏ phun, ba glăi tơlơi dưi brơi dua boh dêh čar, yua anun, kiăng đing nao hơdôm bruă anai, pơhrăm nao rai tơlơi găn rơgao hăng lăng anun lĕ tơlơi gơnang nao kiăng kơtưn rô nao rai pơgi kơdih anai.