Amăng mông bưp, Khua git gai pơ ala mơnuih ƀôn sang dêh čar ơi Vương Đình Huệ lăng yôm hơdôm tơlơi yak nao amăng tơlơi rô nao rai dua Ping gah, dua kơnuk kơna thun blan laih rơgao, sit biă ñu amăng bruă mă dua bơnah tŭ tư tŏ tui ngă dơlăm hăng hrưn đĭ tơlơi rô nao rai ngă hrŏm sui thun djop mơta, pơjing “Tơlơi hơdip djru nao rai pơgi kơdih kơplah wah Việt Nam-Khač jing tơlơi yôm phăn biă mă”". Dua bơnah hok mơ-ak amăng hrơi blan laih rơgao, 6 jơlan gah ngă hrŏm prong kơplah wah dua boh dêh čar hơmâo pok pơhai hăng blung hlâo ba glăi boh tŭ yua sit nik.

Kơ tơlơi rô nao rai kơplah wah dua Ƀirô Khua pơ ala mơnuih ƀôn sang dêh čar, ơi Vương Đình Huệ lăi pơtong amăng djop tơlơi gir run kiăng pơtrut “Đăo gơnang kơđi čar jai hrơi kjăp tui”, tơlơi rô nao rai kơplah wah dua Ƀirô Khua pơ ala mơnuih ƀôn sang dua bơnah ƀu pơdơi hơkrŭ hăng pơđĭ kyar jai dơlăm tui. Khua sang anih jưh pơ ala dêh čar Khač amra tŏ tui pơtrut ba glăi tŭ yua djop mơta bruă ngă hrŏm kơplah wah dua bơnah, pơgôp ngă tui klă tơlơi pơsit hrŏm mơng khua mua; ba tơlơi rô nao rai dua Ping gah, dua kơnuk kơna ƀu pơdơi pơđĭ kyar dơlăm tui, hơđong, hiam klă hăng kjăp phik sui pơ anăp.