Amăng mông bưp dua bơnah hơmâo lăi nao tơlơi rô nao rai ngă hrŏm djop mơta Việt Nam-Hungary amăng thun blan rơgao lêng kơ pơđĭ kyar amăng djop mơta bruă, amăng djop plang, sit biă ñu lĕ bruă kơđi čar-pơtom hiăp, bơwih ƀong-sĭ mơdrô, pơtô pơjuăt, gru grua. Dua bơnah hơmâo tŏ tui na nao bruă pơbưp nao rai khua mua djop gưl, sit biă ñu khua mua pơprong. Bruă pơbưp nao rai khua mua glăk pơgôp ba tơlơi rô nao rai kơplah wah dua bơnah hrưn đĭ prong tui.

Khua git gai pơ ala mơnuih ƀôn sang dêh čar rơkâo dua bơnah tŏ ngă tui hơdôm boh tơhnal amăng tơlơi pơkôl ngă hrŏm kơplah wah dua Ƀirô Khua pơ ala mơnuih ƀôn sang hơmâo kĭ thun 2022. Khua git gai pơ ala mơnuih ƀôn sang pơpŭ dêh čar Hungary hơmâo tơlơi truh kih lơm ngă khua pơplih nao rai amăng Khul EU, čang rơmang lơm glăk ngă khua anai, Hungary amra pơtrut tơlơi rô nao rai ngă hrŏm kơplah wah EU hăng ASEAN hăng tơlơi rô nao rai Việt Nam-EU.