Ƀơi mông tŭ jum, dua čô khua jơnum min bơwih ƀong huă Japan-Việt hăng hơdôm ding kơna, anom bruă sĭ mơdrô amăng grup hơmâo tơlơi čang rơmang djru hrŏm kơ bruă ngă giăng mah dua bơnah dêh čar; pok pơhư prong  bruă mă sĭ mơdrô mơ̆ng gơñu ƀơi Việt Nam hăng lu bruă mă kah hăng pơtô hrăm mơnuih mă bruă thâo rơgơi mơ̆ng anom bruă tuh tia pơkra ming djru ba, ngă hrŏm amăng bruă pơčeh phrâo ia rơgơi phần mềm; pơtô hrăm, pơkra ming apui lơtrik rơgoh hơdjă…

Khua git gai pơ ala mơnuih ƀôn sang dêh čar ơi Vương Đình Huệ lăng yôm tơlơi pơčeh phrâo hrŏm Việt Nam-Japan hơmâo pok pơhai tŭ yua amăng 20 thun rơgao, rơkâo Jơnum min bơwih ƀong huă Japan-Việt ăt kah hăng Keidanren djru hrŏm dơ̆ng djop anom bruă gah Việt Nam kơtưn amăng bruă mă bưp nao rai kah pơpha tơlơi phiăn mă bruă, pơthâo nao rai tơlơi pơhing, tơlơi thâo thăi kơ djop anom bruă kơnuk kơna Việt Nam amăng bruă ngă pơgiong tơlơi phiăn, jơlan hơdră ngă pơblih amuñ hloh bruă tuh pơ alin ƀơi Việt Nam, jing pô pơtruh nao rai djru djop sang bruă sĭ mơdrô dêh čar Japan tuh pơ alin lu hloh rai pơ Việt Nam.