Tơdơi kơ 6 hrơi mơkrah, jơnum lok 9 ječ ameč, khua mua pơ ala tal 15 hơmâo ngă giong boh tơhnal pơkă. Pơhiăp ƀơi mông pơđut jơnum, Khua git gai pơ ala mơnuih ƀôn sang dêh čar ơi Trần Thanh Mẫn lăi pơtong: hơdôm tơlơi pơsit hơmâo khua mua pơ ala mơnuih ƀôn sang dêh čar tŭ ư hrŏm hmao kru, khom ngă tui, djơ̆ hơdră tơpă hơnơ̆ng, lăng nao pơ anăp adih, jing atur kiăng kơ pơđur Ping gah, Kơnuk kơna. Jơnum lok anai, ƀing pơ ala mơnuih ƀôn sang dêh čar sem glăi, pơsit 4 mơta tơlơi phiăn dêh čar, pơsit Hră pơtrun pioh pơsir hơdôm tơlơi pơdjơ̆ nao bruă dăp glăi sang bruă, pơhrŏ mơnuih apăn bruă kơnuk kơna hăng 4 pok hră pơtrun ngă tui bruă dăp glăi, pơhrŏ mơnuih apăn bruă pơ ala mơnuih ƀôn sang dêh čar, kơnuk kơna dêh čar; pơsit 6 Hră pơtrun kiăng pơtrut tơlơi bơwih ƀong huă mơnuih mơnam lŏn ia hăng hơdôm tơlơi pơkă kơ bruă ngă tui jơlan hơdră yom phara hơjăn kơ hơdôm kơčăo bruă, ring bruă phun kơ dêh čar.

Ơi Trần Thanh Mẫn lăi pơtong, anai lĕ gru kơđŏm lăp hơdor pioh amăng bruă čih pơkra tơlơi phiăn dêh čar, hơmâo bruă mă yom bơwih brơi tơlơi hơkrŭ dăp glăi sang bruă, pơhrŏ mrô mơnuih apăn bruă čar kiăng hơbôt hloh amăng glông bruă kơđi čar, tañ hmao pơsir hĭ tơlơi gun, tơnap amăng bruă mă, akŏ pơjing bruă mă phrâo kơtang hloh čuk pơkra hiam atur jơlan glông, sang bruă, ba yua pran kơtang anŏ gêh găl, pơtrut pơđĭ kyar phrâo kơ djop tơring čar hăng amăng dêh čar.