Anai lĕ Khua git gai dêh čar Khač blung a mơ̆ Khua git gai wai lăng pơ ala mơnuih ƀôn sang dêh čar ta ơi Vương Đình Huệ bơkơtuai amăng tal nao čuă sit nik dêh čar Khač. Bruă Khua git gai Ping gah, Khua mir sir dêh čar Khač ơi Tập Cận Bình prăp lui bưp Khua git gai wai lăng pơ ala mơnuih ƀôn sang dêh čar ta ơi Vương Đình Huệ blung a tơdơi kơ grŭp truh pơ̆ Bắc Kinh pơdah tơlơi lăng yôm prong tơlơi rô nao rai dua bôh dêh čar hăng tal čuă mơ̆ng grŭp pơ ala gưl dlông mơ̆ng Ping gah hăng Kơnuk kơna Việt Nam.

Dua gơñu pơdah pran jua mơ-ak ƀơi anăp tơlơi pơđĭ kyar klă mơ̆ng tơlơi rô nao rai Việt Nam hăng Khač, lăi rơđah amra kơtưn đĭ bruă bơkơtuai nao rai mơnuih ƀôn sang, ngă tui bruă mă mơ̆ng khua pơ ala mơnuih ƀôn sang dêh čar, mơnuih ƀôn sang dua bôh dêh čar amăng bruă lăi pơhing, lăi pơthâo nao rai, pơjing tơlơi djơ̆ hrŏm mơnuih mơnam, mơ̆ng anun pơtrut kơtang gum hrŏm kơplah wah dua bôh dêh čar amăng lu bruă. Pơsit yôm hăng pơdah lăng yôm hơdôm tơlơi ba tơbiă gum hrŏm mơ̆ng Việt Nam, Khua git gai Ping gah dêh čar, Khua mir sir dêh čar Khač ơi Tập Cận Bình pơtŏng sit Khač amra gum hrŏm Việt Nam djă pioh bơkơtuai nao rai bruă mă, pơtrut pơbưp gưl dlông hăng hơdôm gưl, kơtưn bơkơtuai, gum hrŏm bruă Ping gah, lăi pơthâo tơlơi găn rơgao, pơblang kơ pơdŏng Ping gah hăng wai lăng lŏn ia, kơtưn gum hrŏm sit nik, pơtrut tañ tô nao rai bruă khom ngă, bơni Việt Nam gum hrŏm tô nao rai hăng hơdôm bruă pơđĭ kyar pơlir hơbit kual prong mơ̆ng Khač./.