Pơhiăp amăng mông pok phun tơña, Khua git gai wai lăng pơ ala mơnuih ƀôn sang ơi Vương Đình Huệ pơtă, bôh yôm tơña wot sang phăt kơđi hăng anom pel ĕp kơđi tơlơi leng kơ hmâo rơwang prong, ƀing khua pơ ala mơnuih ƀôn sang hmâo ba tơbiă tơlơi tơña rơguăt, nao tơpă mơta tơlơi.

Ƀing khua gơnong bruă lăi glăi tơpă, rơguăt, djơ̆ phun than, ngă rơđah hơdôm tơlơi tơña khua pơ ala mơnuih ƀôn sang lăi, hrom hăng anun ba tơbiă hơdôm jơlan gah sit nik, ba glăi bôh tŭ yua, dưi ngă kiăng thâo tui, dưi yua, bôh tơhnal bruă git gai wai lăng, djơ̆ tơlơi kiăng, čang rơmang mơng mơnuih pơ ala kơ mơnuih ƀôn sang hăng mơnuih ƀôn sang đơ đam dêh čar. Mông jơnum tơña bla tal anai jing tal pioh khua gơnong bruă lăi pơthâo truh mơnuih ƀôn sang, ƀing pơ ala kơ mơnuih ƀôn sang hơdôm tơlơi pơhing sit kơ bôh tơhnal bruă mă mơng gơnong bruă pô. Pơđut mông tơña, Jơnum min apăn bruă Khua pơ ala mơnuih ƀôn sang amra mă yua tơlơi pơtrun pơsit kiăng ngă phun than ngă tui hăng lăng tui./.