Amăng mông bơkơtuai, Khua git gai wai lăng pơ ala mơnuih ƀôn sang dêh čar ơi Vương Đình Huệ rơkâo Khač lăng ba, pok prong bruă blơi mut gơnam tam, biă ñu gơnam mă mơng đang hmua amra hmâo tơhnal gal prong mơng Việt Nam, ngă gal brơi kơ gơnam Việt Nam găn rơgao nao truh dêh čar tal 3 tui jơlan rơdêh treng ASIA – EU; pơtrut tañ hmâo hơdôm rơwang bruă tuh pơplai tui hơdră prong, anô̆ klă hiam, mơbruă kơ bôh thâo pơđĭ kyar mơng Khač ƀơi Việt Nam; Kơtưn tô nao rai jơlan glông pioh bơkơtuai, nao rai mơng mơnuih ƀôn sang dua bôh dêh čar.

Ơi Triệu Lạc Tế rơkâo dua bơnah kơtưn bơkơtuai glông bruă Ping gah, biă ñu lĕ bơkơtuai bruă mă kơplah wah Khua mua gưl dlông kiăng pơkă jơlan gah kơ tơlơi rô nao rai dua Ping gah, dua bôh dêh čar; pơtrut klă hơdôm rơwang bruă tuh pơplai; pơtŏng sit Khač amra ngă gal brơi kiăng mơnuih ngă đang hmua Việt Nam pok prong bruă sĭ gơnam kơ dêh čar Khač./.