Tal rai čuă hmâo lu tơlơi yôm phăn lăi nao, biă ñu kiăng hơdor glăi 50 thun hrơi pơjing bruă pơtom hiăp kơplah wah dua bôh dêh čar (1973-2023). Tui hăng hrơi mông pơkă hlâo, mơguah pơgi (4/4), ƀơi Hà Nội, Khua gơgrong bruă Australia amra pŭ bơnga ƀơi Gong kut hơdor glăi ƀing Ling tơhan sông kơtang pơsăn drơi, dưm guang bơnga hăng mut čuă Pơsat jep Khua mir sir Hồ Chí Minh. Kiăo tui anun, Khua mir sir ơi Võ Văn Thưởng amra git gai mông ngă Lơphet čơkă jum sit nik hăng bơkơtuai hăng Khua gơgrong bruă Australia ƀơi Anih mă bruă Khua mir sir.

Amăng hrơi anun mơn, ơi David Hurley bơkơtuai hăng Khua dêh čar ơi Phạm Minh Chính, Khua git gai wai lăng pơ ala mơnuih ƀôn sang dêh čar ta ơi Vương Đình Huệ. Tui hăng Khua anih jưh pơ ala kơ Australia, tal rai čuă mơng Khua gơgrong bruă anai amra djru kơtưn đĭ pran gum hrom dua bơnah dêh čar amăng abih bang hơdôm gưl, hơkrŭ đĭ pran đăo gơnang bruă mă kơplah wah dua bôh dêh čar jing gru pơđom hmư̆ hing amăng Thun hơdor glăi yôm phăn anai./.