Tui tơlơi pơsit, Khul apăn bruă Ping gah tơring čar Kon Tum ruah, jao bruă brơi kơ ơi Xiêng Thanh Phúc, Ding kơna Ping gah tơring čar, Khua khul hlăk ai tơring čar đĭ ngă Khua anom bruă Ping gah tơring čar. Ơi Xiêng Thanh Phúc, djuai ania Giẻ-Triêng, thun tơkeng 1983 ƀơi să Đăk Nông, tơring glông Ngọc Hồi, tơring čar Kon Tum. Ơi Xiêng Thanh Phúc mă bruă gah Khul hlăk ai dong mơng thun 2008 hăng ñu hrăm truh thạc sỹ bruă wai lăng. Dong mơng thun 2016 truh ră anai ngă Khua khul hlăk ai tơring čar Kon Tum.

Đĭ pơhiăp amăng mông jao ngă Khua anom bruă Ping gah tơring čar Kon Tum, ơi Xiêng Thanh Phúc bơni tơlơi đăo gơnang mơng Khul apăn bruă Ping gah tơring čar Kon Tum hăng ƀuăn amra gir run pơhrăm na nao kiăng pơgiong bruă jao. Hlâo anun amăng lơ 30/3, Khul apăn bruă Ping gah tơring čar Kon Tum hơmâo pơphun lăi pơthâo hăng jao tơlơi pơsit pơplih jao bruă hăng ruah ơi Thái Văn Tưởng, Ding kơna Ping gah, Khua anom bruă Ping gah tởỉng čar ngă Khua git gai Ping gah tơring glông Đăk Glei.