Tal nao čuă mơng Khua mir sir dêh čar ta ơi Võ Văn Thưởng pơ̆ dêh čar Lao hmâo laih 18 bruă mă lu mơta hăng tơhnal ƀơi plơi prong jưh jom Vientiane hăng lu bôh tơhnal rơđah rơđông, pơjing rai pran pơtrut phrâo, hmâo bôh tŭ yua yôm phăn kơ bruă gum hrom Việt Nam hăng Lao amăng abih bang hơdôm glông hăng bruă gum hrom.

Tal nao čuă djru pok pơhai ba glăi bôh tơhnal hơdôm tơlơi pơkôl gưl dlông mơng dua Ping gah, dua bôh dêh čar, biă ñu Tơlơi pơkôl bruă gum hrom Việt Nam hăng Lao rơwang mơng thun 2021-2030 hăng Tơlơi pơkôl gum hrom dua bơnah Việt Nam hăng Lao rơwang mơng thun 2021-2025. Tal nao čuă anai, Khua git gai gưl dlông dua bôh dêh čar pơtŏng sit glăi lăng yôm na nao hăng đing nao hlâo hloh kơ bruă hơkrŭ đĭ hăng kơtưn tơlơi rô nao rai giăng mah yôm phăn, gum hrom hơbit pha ra hăng gum hrom abih bang Việt Nam hăng Lao; Lăng anai lĕ kông ngăn yôm, bôh than gơgrong hăng bruă hơkrŭ mơng rim bôh dêh čar./.