Čơtlăm lơ 24/5, tŭ jum Khua anih jưh pơ ala kơ hơdôm bôh dêh čar Qatar, Brazil, Slovenia, Bồ Đào Nha, Estonia hăng Guinea lăi pơthâo hră mơ-it dêh čar čơkă bruă mă ƀơi dêh čar Việt Nam, Khua mir sir dêh čar ta ơi Võ Văn Thưởng pơtong sit, hơdôm bôh ƀirô apăn bruă mơng Việt Nam amra ngă gal brơi kiăng ƀing Khua anih jưh pơ ala pơtrut gum hrom dua bơnah hăng Việt Nam jai hrơi jai pơđĭ kyar kơtang. Tŭ jum Khua anih jưh pơ ala kơ Qatar Khalid Ali Abdullah Abel, Khua mir sir dêh čar mơ-ak kơ tơlơi rô nao rai giăng mah, gum hrom kơplah wah dua bôh dêh čar pơđĭ kyar klă, na nao bơkơtuai grŭp gưl dlông, jê̆ hăng anai lĕ tal nao sit nik Qatar mơng Kơ-iăng Khua mir sir dêh čar ta yă Võ Thị Ánh Xuân (5/2023).

Khua mir sir dêh čar ta rơkâo Khua anih jưh pơ ala amăng rơwang bruă mơng pô pơtrut tơlơi rô nao rai dua bơnah amăng djop bruă hăng pơdah čang rơmang tañ čơkă Ơi pơtao dêh čar Qatar Sheikh Tamim bin Hamad Al-Thani čuă dêh čar Việt Nam amăng thun 2023. Tŭ jum Khua anih jưh pơ ala kơ Brazil Marco Farani, Khua mir sir dêh čar ta ơi Võ Văn Thưởng pơtŏng sit Việt Nam lăng yôm hăng čang rơmang kơtưn hloh dong bruă giăng mah hăng gum hrom abih bang hăng Brazil. Amăng hơdôm mông tŭ jum, Khua mir sir dêh čar ta ơi Võ Văn Thưởng bơni hăng pơsit yôm hơdôm bôh dêh čar dŏng yua tơlơi pơmin mơng ASEAN hăng Việt Nam kơ tơlơi Ia Rơsĭ Ngŏ, pơsir hơdôm tơlơi bơrơsua hăng hơdôm bruă rơnuk rơnua hluai tui tơlơi phiăn, biă ñu UNCLOS 1982, pơhlôm rơnuk rơnua, pơhlôm, mơ-ak klă bruă ia rơsĭ hăng gah rơhuông adai; djă pioh rơnuk rơnua, hơđong hăng pơđĭ kyar kual./.