Amăng mông tŭ jum, Khua mir sir dêh čar ta ơi Võ Văn Thưởng hơ-ưč hmưi Khua anih jưh hmâo ngă giong prong rơwang bruă ƀơi Việt Nam; pơsit yôm hơdôm tơlơi gum hơgôp klă hăng ba glăi bôh tơhnal mơ̆ng Khua anih jưh amăng bruă ngă dơlăm tui tơlơi rô nao rai giăng mah hăng gum hrŏm Việt Nam – Pakistan hơdôm hrơi rơgao, biă ñu bruă gum hrŏm pơphun lu bruă mă tŭ yua ƀrô djơ̆ tal 2 bôh dêh čar hơdor glăi 50 thun hrơi pơdŏng bruă pơtom hiăp amăng thun 2022.

Khua mir sir dêh čar ta rơkâo dua bơnah kơtưn pơplih čuă nao rai grŭp gưl Ding jum, gơnong bruă, tơring čar, ƀôn prong, hơdôm grŭp anom bơwih ƀong, khul grŭp, bơkơtuai mơnuih ƀôn sang hăng grŭp mơnuih pơ ala giăng mah pioh kơtưn thâo hluh nao rai tơdruă, hruă kơjăp pran jua giăng mah Việt Nam hăng Pakistan. Dua bơnah khom gir run ngă tui ba glăi bôh tơhnal hloh dong bruă gum hrŏm hơdôm bruă sĭ mơdrô, tuh pơplai, pơđĭ tui hloh dong prăk pơhrui glăi mơ̆ng gơnam sĭ blơi nao rai dua bơnah./.