Găn rơgao 30 thun akŏ pơjing hăng pơđĭ kyar, truh ră anai Khul hlăk ai ngă bruă sĭ mơdrô Việt Nam hơmâo akŏ pơjing truh pơ 63 boh tơring čar, ƀôn prong; 15 khul ngă hrŏm hăng abih bang 19.000 čô ding kơna. Lu anom bruă sĭ mơdrô mut khul hlăk djru hrŏm sĭ mơdrô dưi pơhrui glăi rơbêh 40 klai dolar Mi hăng pơsir bruă mă brơi kơ 5 klăk čô mơnuih hơmâo bruă mă. Lơ̆m pơđĭ kyar khul hơmâo pơphun lu hơdră, bruă mă yôm pơphăn, djru ba ƀing hlăk ai pơphun bruă mă sĭ mơdrô, hơduah ĕp brơi bruă ngă hrŏm sĭ mơdrô, tuh pơ alin, ngă hrŏm jar kmar.

Pơhiăp ƀơi mông bưp, Khua mir sir jăng jai yă Võ Thị Ánh Xuân lăi pơtong, ƀing hlăk ai ngă bruă sĭ mơdrô lĕ jing ƀing ngă bruă phun djru hrŏm pơtrut bruă pơblih phrâo lŏn ia, pơđĭ kyar hăng mut phung jar kmar; rơkâo kơ Khul hlăk ai ngă bruă sĭ mơdrô Việt Nam, kiăng djă pioh kjăp boh tơhnal dưi ngă, pơđĭ tui bruă mă hiam thun blan rơgao, ăt khom pơblih phrâo boh yôm phun či mă bruă, hơdră akŏ pơphun bruă mă kiăng kiăo tui hmao anŏ pơblih phrâo rơnuk anai ƀơi rŏng lŏn tơnah, laih anun kiăng ngă djơ̆ anŏ či kiăng mơ̆ng lŏn ia, hăng khom ngă djơ̆ anŏ hơduah ĕp mơ̆ng khul mơnuih ngă ding kơna amăng khul sĭ mơdrô.