Pơhiăp ƀơi mông jơnum, Khua mir sir ơi Lương Cường bơni hơ-ơč abih bang amăng khul ling tơhan hăng bơni kơ boh tơhnal dưi ngă mơ̆ng ping gah ling tơhan dêh čar, Ding jum ling tơhan laih anun ƀing khua mua, ling tơhan, mơnuih mă bruă amăng ling tơhan dưi ngă amăng thun 2024. Tŭ ư hăng hơdră či mă bruă, hơdră pơsir hơmâo pơdah thâo, Khua mir sir rơkâo anom bruă ping gah ling tơhan dêh čar, Ding jum ling tơhan ăt pơtô lăi tong ten, dơlăm hloh amăng bruă mă tui hăng tơlơi dưi, lăi pơthâo hăng ping gah, kơnuk kơna gah bruă ling tơhan, pơgang lŏn ia; prăp lui hmar amăng bruă mă, pơđĭ tui tơlơi thâo kơsem min, lăi lui hlâo, hơmâo hơdră bong glăi djơ̆, beč bal, tŭ yua amăng djop bruă, anăm lui hơmâo tơlơi dŏ kơtuă, pơgang tơlơi rơnuk rơnua hơđong, akŏ pơdong pơđĭ kyar lŏn ia.

Khua mir sir pơtrun hiăp abih bang amăng ling tơhan, ngă tui tơpă jơlan hơdră abih bang mơnuih ƀôn sang gum hrŏm pơgang lŏn ia, tơlơi blah wang hơmâo mơnuih ƀôn sang djru hrŏm, pơgang lŏn ia amăng rơnuk phrâo, kơnang kơ mơnuih ƀôn sang ngă phun; Laih dơ̆ng ngă tui klă jơlan hơdră lir hơbit hăng bruă pơgang lŏn ia laih anun bơwih ƀong huă, kơsem min, ming pơkra glăi hơdră bong glăi gêh găl, pioh pơphun brơi ling tơhan ngă tui amăng tơlơi pơhing phrâo.