Tlam lơ 28/4, ƀơi tơring čar Hà Tĩnh, Khua mir sir ơi Lương Cường hơmâo mông tŭ jum Khua git gai Ping gah, Khua mir sir Lao ơi Thongloun Sisoulith ƀrô hrơi ñu rai pơ Việt Nam ngă lơphet pok tơdrun mrô 3-Tơdrun kompăn Vũng Áng-sa amăng hơdôm ring bruă yôm phun tô nao rai bơwih ƀong huă kơplah wah dua bơnah hăng nao ngă lơphet hơdor glăi 50 thun hrơi pơklaih rơngai kual Dơnung, pơlir lŏn ia ta. Amăng mông bưp, Khua mir sir pơpŭ hăng lăng yôm hơdôm tơlơi dưi amăng dêh čar Lao dưi ngă amăng thun blan rơgao hăng pơdah pran đăo gơnang nao tơlơi git gai mơng Ping gah mơnuih ƀôn sang Lao, khua apăn akŏ lĕ ơi Thongloun Sisoulith, dêh čar Lao amra tŏ tui hơmâo lu tơlơi dưi phrâo dong, prong ƀiă dong, ngă truh kih tơlơi pơtrun mơng Jơnum tal XI, pơphun truh kih Jơnum Ping gah mơnuih ƀôn sang ngă hơkrŭ dêh čar Lao tal XII.

Kơ bruă ngă lơphet hăng mă yua tơdrun mrô 3, tơdrun kompăn Vũng Áng, Khua mir sir ơi Lương Cường đăo gơnang, tơdrun mrô 3-Tơdrun kompăn Vũng Áng amra pơhlôm brơi bruă pơdŭ pơgiăng gơnam tam jai hrơi lu tui mơng dua bơnah, djru brơi klă kơ bruă pơdŭ pơgiăng gơnam tam găn nao rai hăng sĭ mơdrô hăng dêh čar Lao, mơng anun pơgôp amăng bruă pơđĭ kyar hăng mut hrŏm bơwih ƀong huă mơng rĭm boh dêh čar.