Rơgom ơi Trần Đức Lương, tơkeng lơ 5/5/1937; plơi pla pơ̆ să Phổ Khánh, tơring glông Đức Phổ (ră anai lĕ plơi prong Đức Phổ), tơring čar Quảng Ngãi. Dô̆ ƀơi sang mrô 298, jơlan Vạn Phúc, phường Liễu Giai, quận Ba Đình, ƀôn prong Hà Nội. Gum ngă hơkrŭ blan 2/1955; mut Ping gah Cộng sản Việt Nam lơ 19/12/1959.

Hơdôm thun blan mă bruă

Blan 2/1955 truh blan 9/1955: Ñu nao pơhrăm pơ̆ kual Kơdư dêh čar hrăm sơ cấp măi mok pơkă lăng lŏn drŏn Ding jum sĭ mơdrô.

Blan 10/1955 truh blan 8/1959: Ñu mă bruă gah măi mok amăng hơdôm Grŭp, khul hyu hơduăh ĕp lăng lŏn drŏn; hrăm Trung cấp gah lŏn drŏn 8 blan.

 Blan 9/1959 truh blan 3/1964: Ñu ngă Khul Grŭp hyu hơduăh ĕp lô̆n drŏn 4, Grŭp mă bruă gah lŏn drŏn 20, Khua git gai Khul hyu hơduah ĕp lŏn drŏn 4, Ding kơna Grŭp mă bruă Khul hlăk ai mă bruă, Anom mă bruă lŏn drŏn, Ding kơna grŭp Ping gah.

Blan 4/1964 truh kơ blan 8/1966: Ñu ngă Kơ-iăng Khua grŭp mă bruă măi mok lŏn drŏn 20; Khua git gai Ping gah, Ding kơna git gai Ping gah pơlir hơbit.

Blan 9/1966 truh blan 1/1970: Ñu lĕ čơđai sang hră gưl dlông, ngă Khua anih hyu hơduăh ĕp hlung lŏn drŏn (K11) gưl dlông; Ding kơna Ping gah sang hră, Khua git gai Khul hlăk ai Sang hră (thun 1969).

Blan 2/1970 truh blan 8/1975: Ñu ngă Kơ-iăng Khua Anom hla kak lŏn drŏn; Ding kơna Ping gah, Ding kơna Grŭp apăn bruă Ping gah Anom wai lăng hla kak lŏn drŏn.

 Blan 9/1975 truh blan 9/1977: Ñu hrăm ƀơi Sang hră Nguyễn Ái Quốc dêh čar ta; ngă Khua git gai Ping gah anih hrăm.

  Blan 8/1977 truh blan 7/1979: Ñu ngă Kơ-iăng Khua Khul mut phung sang hră, Pô gơgrong bruă Khul mut phung Grŭp wai lăng hla kak lŏn drŏn, Anom mă bruă gah lŏn drŏn; Khua git gai Ping gah Anom, Ding kơna Grŭp mă bruă Khul mut phung Anom wai lăng bruă lŏn drŏn; Ding kơna Grŭp mă bruă Khul mut phung dêh čar Việt Nam. 

Blan 8/1979 truh blan 1/1987: Ñu ngă Khua Anom bruă lŏn drŏn, Khua git gai mơnuih apăn bruă Ping gah Anom; anih hrăm wai lăng bơwih ƀong 4 blan ƀơi Anom pơtô bruă Bơwih ƀong Liên Xô (thun 1981). Ngă Khua pơ ala mơnuih ƀôn sang tal 7, Kơ-iăng Khua, Khua Jơnum min kơsem min bôh thâo phrâo hăng hơdră mă yua măi mok mơ̆ng Khua pơ ala mơnuih ƀôn sang; Kơ-iăng Khua Jơnum min Khul giăng mah Việt – Xô.

 Amăng mông jơnum khua pơ ala đơ đam dêh car ta tal 5 mơ̆ng Ping gah (blan 3/1982), Ñu dưi ruah ngă Ding kơna pơhlôm hlâo Grŭp mă bruă Ping gah dêh čar ta. Amăng mông jơnum khua pơ ala đơ đam dêh čar tal 6 mơ̆ng Ping gah (blan 12/1986), Ñu dưi ruah ngă Ding kơna Grŭp mă bruă Ping gah dêh čar.

 Blan 2/1987 truh blan 8/1992: Ñu ngă Kơ-iăng Khua Khul Khua Ding jum; Khua pơ ala kơ Kơnuk kơna dêh čar djop mơnuih dưm kơnar Việt Nam ƀơi Khul djru bơwih ƀong (SEV). Ƀơi mông Jơnum khua pơ ala đơ đam dêh čar tal 7 mơ̆ng Ping gah (blan 6/1991), Ñu dưi ruah ngă Ding kơna Grŭp mă bruă Ping gah dêh čar.

Blan 9/1992 truh blan 8/1997: Ñu ngă Kơ-iăng Khua dêh čar. Amăng mông jơnum khua pơ ala đơ đam dêh čar tal 8 mơ̆ng Ping gah, Ñu dưi ruah mut amăng Grŭp mă bruă Ping gah dêh čar, dưi hmâo Grŭp mă bruă Ping gah dêh čar ruah mut amăng Ding jum kơđi čar (blan 6/1996).

Blan 8/1997 truh blan 11/2007: Ñu ngă Khua mir sir dêh čar, Khua Khul pơgang lŏn ia hăng rơnuk rơnua plơi pla (blan 9/1997); Ding kơna Ding jum kơđi čar (blan 1/1998). Amăng mông Jơnum khua pơ ala đơ đam dêh čar tal 9 mơ̆ng Ping gah, Ñu dưi ruah mut amăng Grŭp mă bruă Ping gah dêh čar, dưi hmâo Grŭp mă bruă Ping gah dêh čar ruah mut Ding jum kơđi čar (blan 4/2001).

  Ñu lĕ Ding kơna Grŭp mă bruă Ping gah dêh čar hơdôm tal V, VI, VII, VIII, IX; Ding kơna Ding jum kơđi čar tal 8, 9; Ding kơna apăn bruă Ding jum kơđi čar tal 8; Kơ-iăng Khua Khul Khua Ding jum mơ̆ng blan 2/1987 truh blan 9/1992; Kơ-iăng Khua dêh čar mơ̆ng blan 10/1992 truh blan 8/1997; Khua mir sir dêh čar, Khua Khul pơgang lŏn ia hăng rơnuk rơnua plơi pla tal 10, tal 11; khua pơ ala mơnuih ƀôn sang dêh čar hơdôm tal VII, VIII, X, XI. Ñu dưi hmâo Ping gah, Kơnuk kơna brơi pơdơi lơtret tui hơdră pơkă mơ̆ng lơ 1/1/2008.

Yua kơ pran jua tuh rơyuh pran jua prong, tơlơi gum hơgôp amăng bruă ngă hơkrŭ mơ̆ng Ping gah hăng mơ̆ng djuai ania, Ñu dưi hmâo Ping gah, Kơnuk kơna ƀơk Miđai bôh pơtŭ ia mah, Miđai 65 thun Ping gah hăng lu miđai, črăn bơni, anăn păn yôm phăn mơ̆ng Việt Nam hăng Jar kơmar./.