Ƀơi Điện Kính Thiên, hăng kơčong čư̆ Nghĩa Lĩnh hing ang, hăng pran jua hơdor tơngia tơlơi gum pơgôp mơng rơnuk ơi yă, pơdah pran jua “Mơñum ia hơdor kơ pô klơi” mơng mơnuih ƀôn sang Việt Nam, Khua mir sir ơi Lương Cường hrŏm hăng ƀing khua mua Ping gah, kơnuk kơna hăng khua mua gong gai ƀon lan mut nao pra yang tŭi ñang, dưm guang bơnga, pơdah pran hơdor tơngia ƀing mơnuih hơmâo pơgôp prong amăng pơjing lŏn ia kiăng ană tơčô tŏ tui gru grua Lạc Hồng pơjing lŏn ia Việt Nam jai hiam klă ră anai.

Găn rơgao sui thun pơjing hăng wai pơgang, pran hơdor tơngia jing pơlir kjăp, anih gơnang nao, pơtrut pran kơtang mơng djuai ania, ba glăi tơlơi dưi prong hăng anăn Việt Nam amăng pơgang tơlơi truh sat mơng ayuh hyiăng, kơdong glăi ayăt, wai pơgang lŏn ia ta. Hrơi huă pơsat ơi pơtao Hùng ƀu djơ̆ kơnong lĕ hrơi ngă yang prong mơng djuai ania đôč ôh mơ̆ ăt lĕ hrơi mông ngă lar hyu pran khăp lŏn ia, pran gơgrong hăng hrưn đĭ-djơ̆ tui tơlơi pơtô mơng wa Hô “Ƀing ơi pơtao Hùng hơmâo pơjing lŏn ia, wa amon ta kiăng gơgrong wai pơgang”.