Amăng mông pơhiăp, dua čô khua lêng pơsit tong, hăng hơdôm tơlơi dưi hing ang amăng bruă ngă hrŏm dua bơnah amăng 50 thun laih rơgao, sit biă ñu lĕ tơlơi truh kih mơng tal rai čuă anai, tơlơi rô nao rai dua bơnah amra pơđĭ kyar prong kơtang dong, 50 thun tŏ tui pơ anăp tơlơi rô nao rai amra pơplih phrâo dong.

Khua mir sir ơi Võ Văn Thưởng hơdor glăi hơdôm tơlơi yak nao yôm phăn kơplah wah Việt Nam - Australia, pơsit tong aka ƀu ƀuh tơlơi rô nao rai dua bơnah kjăp phik hăng pơđĭ kyar hiam klă tui ră anai, laih dong lăng yôm bruă Australia lêng kơ đing nao rơnoh prăk djru ODA brơi kơ Việt Nam, pơgôp yôm phăn amăng pơđĭ kyar bơwih ƀong huă-mơnuih mơnam, hrưn đĭ tơlơi hơdip mơda kơ mơnuih ƀon sang Việt Nam, Khua gơgrong bruă dêh čar Australia pơsit tong, Australia hok mơ-ak lơ̆m hơmâo gơyut gơyâo, dêh čar ngă gŏp đăo gơnang hăng jê̆ giăm Việt Nam. Dua bơnah glăk ngă pơgiong hơdôm tơlơi pơsit hrŏm amăng kual Ấn Độ Dương-Thái Bình Dương, lĕ kual hơđong, pơdrông asah, anih mơ̆ tơlơi dưi hăng hơdôm tơlơi phiăn jar kmar arăng lăng yôm hloh.