Giăm 400 čô mơnuih dưi tŭ mă tơlơi apah bơni yôm mơnuih rơgơi kơhnâo, mơnuih kơhnăk bruă mă NSND, NSUT gah lu bruă mă adoh suang, pơčeh tơlơi adoh suang, čih ră ruai tơlơi hơ̆k hơr, ngă phim, ƀing suang, ƀing pơtui jua pơhiăp, pơdah rup tivi, ƀing ngă sen rơgơi. Khua mir sir ơi Võ Văn Thưởng nao jơnum, đĭ pơhiăp hăng jao hră apah bơni yôm kơ ƀing nghệ sĩ nhân dân mơnuih kơhnăk djă anăn mơnuih kơhnâo ƀôn sang hăng ƀing kơhnăk bruă mă.

Pơhiăp ƀơi mông jơnum ơi Võ Văn Thưởng pơ ala kơ khua mua ping gah, kơnuk kơna mơ-it hiăp bơni hơ-ơč hiam klă hloh kơ abih bang ƀing mơnuih rơgơi kơhnâo, ƀing kơhnăk adoh suang tŭ mă tơlơi apah bơni tal anai, jing ƀing mă bruă sơ̆n pran jua, hur har, thâo pơčeh phrâo laih anun hơmâo pran jua pơgôp hrŏm hiam klă kơ bruă ngă mơak pran jua tơlơi hơdip mơda ană plơi pla amăng lŏn ia.

Khua mir sir pơdah pran jua đăo kơnang, djop gưl rơnuk ƀing kơhnăk adoh suang tŏ tui na nao djă pioh tơlơi thâo, ia rơgơi thâo pơčeh mơak, hiam klă lu mơta laih anun pran jua thâo khăp kơ lŏn ia, lir hơbit hăng bruă mă bơwih brơi kơ mơnuih ƀôn sang, djru hrŏm bruă mă pơblih phrâo lŏn ia yua ping gah git gai, khul grup ƀing thâo pơčeh phrâo tơlơi adoh suang, čih ră ruai tơlơi hơ̆k hơr ăt pơgôp thim lu tơlơi čih, hơdră ngă sen adoh suang hiam mơak, djru hrŏm ngă tơpă amăng tơlơi pơmin, pran jua khăp kơ tơlơi mơak djơ̆ tui amăng rơnuk phrâo, gum hrŏm nao amăng bruă akŏ pơdong lŏn ia, ngă atur pran jua tơlơi pơmin mơnuih mơnam, pơgôp prong hloh amăng bruă mă anăp nao kơ djuai ania.