Ƀơi mông bưp, Dua čô khua hok mơak biă hăng tơlơi rô nao rai jai hrơi klă hiam plah wah Việt Nam - Lao, amăng djŏp bruă, mơ̆ng kơđi čar, pơtom hiăp, rơnuk rơnua - pơgang lŏn ia truh kơ bruă bơwih ƀong, gru grua, pơtô hrăm hăng ngă hrŏm djŏp tơring. Pơ anăp, dua bơnah tŭ ư đăo kơnang kjăp hloh bruă kơđi čar; hyu čuă jơmư re se, bơbưp khua mua prong hăng djŏp gưl ƀơi Ping gah, Kơnuk kơna, Khua mua pơ ala mơnuih ƀôn sang dêh čar, khul khua pơ ala mơnuih ƀôn sang tơring čar hăng bơbưp mơnuih ƀôn sang; pơtrut ngă hrŏm sa mơta bruă apăn, kah pơpha, lăi pơthâo tơlơi rơgơi plah wah Khul wai lăng djuai ania, hơdôm Jơnum min hăng Khul giăng mah dua boh dêh čar amăng bruă čih pơkra akŏ pơjing tơlơi phiăn, krăp lăng hăng pơđĭ hơdôm bruă yơyom mơ̆ng lŏn ia; dong yua nao rai amăng hơdôm tal jơnum khua pơ ala amăng kual, hăng jar kmar kah hăng AIPA, IPU, APF či pơgang ba tơlơi klă hrŏm kơ dua boh dêh čar hăng amăng kual.

Dua bơnah tŭ ư ngă hrŏm kjăp hloh djŏp bruă ngă lơphet 65 thun akŏ pơjing tơlơi rô nao rai laih anun 50 thun kĭ Hră ngă giăng mah hăng Ngă hrŏm Việt Nam - Lao amăng thun 2027, bang hyu tơlơi ngă hrŏm giăng mah pŭ ƀăn, gum pơgôp yom pơphăn plah wah Việt Nam - Lao truh pơ abih bang mơnuih ƀôn sang dua boh dêh čar, biă ñu lĕ rơnuk hlăk ai. Dua boh dêh čar pok pơhai tŭ yua hơdôm hră pơkôl khua mua pơprong hăng boh tŭ yua Jơnum tal 48 Jơnum min pơlir Kơnuk kơna Việt Nam - Lao, ba glăi tơlơi gêh găl sit nik kơ mơnuih ƀôn sang dua boh dêh čar, pơbă tui tơlơi rô nao rai Lao - Việt Nam hiam na nao, mơtah na nao, kjăp phik na nao./.