Dua tơlơi phiăn hơmâo tơlơi đing nao pơgôp hiăp hloh mơng ƀing khua mua anun lĕ tơlơi phiăn dưm dăp gong gai ƀon lan (čih pơkra glăi) hăng črăn tơlơi phiăn nai pơtô. Pơgôp hiăp amăng črăn tơlơi phiăn nai pơtô, yă Lê Thị Kim Oanh, kơ-iăng Khua gơnong bruă pơtô pơjuăt tơring čar Dak Lak brơi thâo: Hơdôm hơdră djru phrâo, sit biă ñu hăng ƀing nai pơtô sang hră čơđai anet, anun lĕ brơi pơdơi lơtret tañ ƀiă 5 thun pơhmu hăng thun pơdơi lơtret hrŏm, djru brơi anih dŏ, bơwih brơi tơlơi suaih pral, pơtô hrăm brơi bruă mă lăp djơ̆ tơlơi rơkâo sit nik, ngă pơtrut pran mă bruă mơng ƀing nai pơtô abih pran jua hăng bruă mă.

Yua tŏ tui apah prăk pơhrua lĕ bruă kiăng mơnuih mơnam tŭ yap hăng lăng yôm hơdôm tơlơi gum pơgôp mơng ƀing nai pơtô hăng pơsur pran jua kơ ƀing gơñu tŏ tui ngă bruă sui ƀiă, mơng anun pơhlôm brơi bruă pơtô pơjuăt hơđông hăng klă tui.