Ƀơi tơring kual Ia Ly, grup hơmâo pok pơhai man pơdong sang khăp pap nua ñu 80 klăk prăk brơi amon Rơ Châm Quyên-čơđai sang hră ƀun rin ƀu hơmâo lŏn ngă hmua, amĭ ama hyu mă bruă arăng apah. Ơi Đỗ Văn Chiến čang rơmang sang phrâo anai amra djru brơi sang anŏ hơđong tơlơi hơdip mơda, hrưn đĭ pơklaih mơng ƀun rin.

Ƀơi să Ia Ka, grup hyu mă bruă ăt nao trơ̆i akhăn pok mă yua tơdrŏn apah boh lông nua ñu 150 klăk prăk, pơkra ming sang drông hăng sang gru grua plơi pla nua ñu 80 klăk prăk, dưm truă 5 anih yua wifi. Ăt hrơi anun mơn, grup hơmâo nao čuă, ƀơk gơnam amĭ Việt Nam sông kơtang Lê Thị Thọ (93 thun), dŏ amăng plơi prong Pleiku, pơdah pran hơdor tơngia hăng djop rơnuk hơmâo tuh rơyuh pran jua wai pơgang lŏn ia.