Tlam lơ 9/6, ƀơi sang jơnum prong khua pơ ala mơnuih ƀôn sang dêh čar, ơi Trần Thanh Mẫn, Khua git gai pơ ala mơnuih ƀôn sang dêh čar git gai jơnum lok klâo mơ̆ng Jơnum min čih pơkra, pơhrua phiah phiăn thun 2013. Khua git gai pơ ala mơnuih ƀôn sang dêh čar lăng yom, bruă mă mơ̆ng kơnuk kơna, Jơnum min djop djuai ania mơnuih mơnam Việt Nam, Ding jum Tơlơi phiăn, Ding jum kông an thun blan rơgao hơmâo djru bruă čih pơkra, pok pơhai bruă mă, pơtô djop sang bruă kơnuk kơna, ngă tui tŭ yua mă hiăp mơnuih ƀôn sang, čih pioh tơlơi pơgôp hiăp mơ̆ng mơnuih ƀôn sang, mơnuih mă bruă kơnuk kơna ngă djơ̆ hrơi blan pơkă. Djop sang bruă pôr tơlơi pơhing, hră pơhing phrâo hơmâo in tơglit, pôr lu tơlơi pơhing kơ bruă mă mă hiăp mơnuih ƀôn sang pơgôp kơ Hră pơtrun.

Giong čih pơƀut glăi, hơmâo 280 klăk wơ̆t tơlơi pơgôp hiăp mơ̆ng mơnuih apăn bruă, sang bruă kơnuk kơna, mơnuih ƀôn sang pơgôp hiăp kơ boh yom phun, tơlơi pơkă amăng Hră pơtrun; amăng anun, rơnoh jŭ yap tơlơi tŭ ư hơmâo rơbêh 99,75%, tơlơi anai pơƀuh rơđah hloh lĕ, jơlan hơdră djơ̆ lăp mơ̆ng Ping gah hăng khua pơ ala mơnuih ƀôn sang dêh čar laih anun tơlơi bơ tŭ ư hrŏm mơ̆ng abih bang “Tơlơi kiăng mơ̆ng ping gah, djơ̆ pran jua ană plơi”. Khua git gai pơ ala mơnuih ƀôn sang dêh čar rơkâo, tơdơi kơ jơnum anai, djop sang bruă anom bruă ngă giong hră pơar čih pơkra Hră pơtrun pioh pơdah thâo kơ ƀing pơ ala mơnuih ƀôn sang dêh čar pơsit hĭ tañ hloh tơdah dưi, gir run truh lơ 16/6 kiăng ngă djơ̆ hrơi blan pơkă kơ bruă dăp glăi, ngă hơbôt hloh sang bruă kơnuk kơna laih anun ngă tui hơbô̆ bruă kơnuk kơna ƀơi gưl tơring čar dŏ glăi dua gưl.