
Dak Lăk akŏ pơdong 1 grup wai lăng bruă pơplông, hăng 53 boh sang hră pơplông, hơmâo 948 anih pơplông hơmâo prăp lui ƀơi hơdôm boh sang hră gưl prong hăng Anih pơtô hrăm re se. Abih bang čơđai čih anăn pơplông thun anai rơbêh kơ 22.600 čô čơđai, amăng anun hơmâo rơbêh 530 čô čơđai mơ̆ng rơngiao. Truh mông anai, bruă hơduah ĕp, sem lăng hăng prăp rơmet anih anom gơnam yua ƀơi hơdôm anih pơplông hơmâo ngă giong laih. Bruă kih rơmet sang hră, hơdjă mơnŏng ƀong huă, ia jrao hăng hơdră pơhlôm rơnuk rơnua, wai lăng jơlan nao rai ăt hơmâo hơdôm anom bruă ngă hrŏm klă. Gơnong bruă pơtô hăng pơjuăt Dak Lăk pơphun pơtŏp brơi kơ rơbêh 2.200 čô nai, mơnuih mă bruă amăng tal pơplông anai.

Tal pơplông abih anih 12 thun anai ƀơi tơring čar Kon Tum hơmâo rơbêh 5.300 čô mơnuih čih anăn pơplông, amăng anun hơmâo giăm 1.800 čô mơnuih djuai ƀiă. Kiăng pơhlôm klă bruă pơplông, ăt kah hăng rơnoh pơplông dưi hĭ lu hloh, djop sang hră ƀơi kual ataih, tơnap tap hăng sang hră đôm lăm kơnuk kơna čem rông hlăk pơtô pơhrua glăi kiăng čơđai huăi wor rơbit tơlơi hrăm, đah mơ̆ng mut pơplông hơđong pran jua, ƀing nai pơtô pơčrâo brơi, pơtô glăi tong ten, pơhrăm brơi čơđai kiăng huăi tơtư̆, ngă juăt hăng tơlơi či pơplông, pơhrăm brơi pơplông mơ̆ng anih, mơ̆ng djop tơlơi hrăm lông ngă lăng tong ten. Djop sang hră đôm lăm ăt đing nao wơ̆t mơnong ƀong huă, asơi añăm kiăng djop pran jua kơ čơđai sang hră, ngă gêh găl đut tơhnal pơtrut pran jua gơñu pơhrăm glăi tơlơi hrăm hlâo kơ truh hrơi nao pơplông.

Viết bình luận