Ƀơi mông jơnum abih bang mơ̆ng Jơnum khua mua prong kơ ia rơsĭ mơ̆ng Sang gum hơbit djŏp dêh čar tal 3 (UNOC 3), hơmâo pơphun ƀơi dêh čar Prang, Khua dêh čar ơi Phạm Minh Chính hơmâo laih tơlơi pơhiăp yôm pơ ala brơi kơ 10 boh dêh čar kual ASEAN, laih dong pơdah tơlơi pơmin mơ̆ng Việt Nam kơ bruă wai pơgang hăng mă yua klă djŏp mơta ra mơnŏng hơmâo amăng ia rơsĭ. Khua dêh čar jak iâu jar kmar kiăng mă bruă tañ hloh, kơtang hloh, khut khăt hloh dong laih anun kiăng hơmâo tơlơi gum tơngan mơ̆ng hơdôm boh dêh čar, kual hăng đơ đam rŏng lŏn tơnah amăng bruă wai lăng hăng mă yua hơđong ia rơsĭ mơtah.

Khua dêh čar ba tơbiă 4 mơta tơlơi kiăng ngă hlâo: bong kjăp tơlơi rơngai, ngă hrŏm ƀơi ia rơsĭ; pơtrut wai lăng ia rơsĭ hơđong kjăp; lăng ia rơsĭ kah hăng tơlơi yôm phun pơtrut đĭ kyar; hăng pơđĭ tui bruă ngă hrŏm ƀơi rŏng lŏn tơnah kiăng đĭ kyar hơđong kjăp. Ñu ăt lăi nao mơn tơlơi yôm mơ̆ng Hră kĭ pơkôl Công ước Sang gum hơbit djŏp dêh čar kơ Tơlơi phiăn ia rơsĭ thun 1982 kar hăng tơlơi phiăn wai lăng ia rơsĭ. Khua dêh čar ba tơbiă hơdôm jơlan hơdră pơ anăp: pơmut hrŏm boh thâo ia rơgơi hăng tơlơi hơmâo hơđăp đưm hlâo, pơtrut boh thâo ia rơgơi hăng boh thâo mrô, mă yua djŏp tơlơi gêh gal bơwih ƀong gah ia rơsĭ, ngă hrŏm hăng lu bruă pơkŏn pơtruh hăng lu dêh čar laih anun pơtrut ngă hrŏm jar kmar. Việt Nam ƀuăn ngă bruă kơtang hloh, abih bang kiăng dưi ngă tui hơnong pơkă, hăng pran jua “3 tơlơi prăp rơmet hlâo”: pok pơhai hơdră đĭ kyar bơwih ƀong huă ia rơsĭ mơtah, ngă hrŏm jar kmar, hăng nao hlâo amăng djŏp tơlơi pơčeh rơgơi wai lăng ia rơsĭ./.