Hơjan ƀơi kual giăm guai tơring čar Dak Nông phrâo ưt, pă čô tơhan kông ang să Quảng Trực, tơring glông Tuy Đức tŏ tui hrŏm hăng adơi ayong nao man pơdong sang, djru brơi sa boh sang anŏ ƀơi ƀon Bu Prăng 1A. Thiếu tá Nguyễn Văn Dũng, kơ-iăng khua kông ang să Quảng Trực brơi thâo kiăng pơhlôm djơ̆ hrơi mông, ngă klă hăng man pơdong kjăp djru brơi mơnuih ƀôn sang, laih dong ăt tŏ ngă tui bruă jao wai pơgang rơnuk rơnua amăng ƀon lan, abih tih 31 čô mơnuih apăn bruă, ling tơhan amăng anom bruă pơplih nao rai djru bruă man pơdong sang.

“Kông ang să hơmâo jao bruă brơi rĭm grup kiă tui wai lăng hơdôm grup hyu man pơdong amăng plơi pla hơmâo lu sang anŏ ƀun rin, giăm ƀun rin arăng djru brơi tui jơlan hơdră ruh pơkra glăi sang tơ̆i phŏ. Ƀing gơmơi lêng kơ kiăo tui hơdôm hơnong pơkă “3 khăng” hơmâo: pơnăng khăng, rang khăng hăng bơbung kjăp pơhlôm bơyan hơjan huăi ia tơdjoh. Kơ bruă mă, pơkiăo nao kông ang kiăo tui lăng hơdôm grup man pơdong hăng rơkâo ƀing gơñu man pơdong tui hơnong pơkă”.

Amai Thị Thướt, 36 thun, djuai ania M’nông dŏ amăng ƀon Bu Prăng 1A, anai lĕ amĭ glăk rông dua čô ană hajăn. Rơkơi ñu rơngiă yua ruă kă, sa čô ñu gir run ngă dua ar đang kơphê hăng hyu mă bruă arăng apah, pơhrui glăi ăt ƀu lu hlơi. 3 amĭ ană glăk dŏ amăng sang tơ̆i phŏ hrŏm hăng amĭ ama gơñu, prong aka truh 20 met karê, pơnăng phŏ, bơbung brêng laih. Phrâo anai, amai Thướt lĕ sa amăng hơdôm hơpluh boh sang anŏ amăng plơi pla arăng djru man pơdong sang. Amai Thị Thướt brơi thâo, hơmâo arăng djru brơi sang dŏ, ñu hok mơ-ak biă mă.

“Rơkơi kâo rơngiă thun 2023, hajăn čem rông 2 čô ană, tơlơi hơdip tơnap tap biă mă, sang anŏ gơmơi lĕ sang anŏ rin hloh amăng plơi. Hơmâo kông ang djru man pơdong sang tlâo amĭ ană hok mơ-ak biă mă. Pơ anăp anai mut dŏ sang phrâo huăi hŭi hơjan ia tơdjoh, angĭn thut mut amăng lăm, pơ-iă uh amăng bơyan không pang. Ră anai kâo hơđong pran jua ngă hmua, hyu mă bruă arăng apah kiăng kơ čeng rông ană bă. Bơni Kông ang, djop gưl, gơnong bruă amăng ƀon lan”.

Mut hrŏm jơlan hơdră mơng Kơnuk kơna kơ ruh pơkra glăi sang dŏ jang jai, sang tơ̆i phŏ kơ hơdôm boh sang anŏ ƀun rin, giăm ƀun rin hăng sang anŏ tui hơdră djru, sang anŏ djuai ania ƀiă, mơng thun 2024 truh ră anai. Ding jum kông ang hơmâo gum pơgôp, pơtrut pơsur man pơdong hơdôm rơbâo boh sang ƀơi hơdôm boh tơring čar kual Dap kơdư.

Kơnong ƀơi Dak Nông, thun 2025 hơmâo 500 boh sang djru man pơdong hăng nua ñu 30 klai prăk, jao brơi kông ang tơring čar ngă tui. Tơdơi kơ tŭ mă prăk djru, kông ang tơring čar Dak Nông akŏ pơjing 5 grup djru bruă yua ƀing khua mua wai lăng, pơphun bruă pơplông 56 hrơi mlăm mă bruă dong mơng lơ 12/5-30/6 kiăng pơgiong.

Tui kông ang tơring čar Dak Nông, mah hrơi blan pok pơhai ngă bruă hơmâo pơphun amăng bơyan hơjan, nua blơi čuah pơtâo, sit biă ñu lĕ čuah đĭ kơtang hăng glăk kơƀah…samơ̆ tui tơlơi git gai khut khăt mơng Ping gah, khua mua kông ang tơring čar, hơdôm grup djru bruă, tơlơi mut hrŏm mơng djop anih anom kơđi čar hrŏm hăng pran gir run prong hloh mơng tơhan kông ang tơring čar, amăng anun akŏ phun  lĕ kông ang gưl să, tơdơi kơ giăm 3 wŏt hrơi tơjuh pok pơhai, abih tih 500 boh sang hơmâo man pơdong, rơbêh 100 boh sang hơmâo pơgiong, dưm dưm rơbêh 30% tui tơlơi pơkă. Đại tá Trần Văn Dũng, kơ-iăng Khua kông ang tơring čar Dak Nông brơi thâo, lu hơdră bruă hơmâo pok pơhai kiăng găn rơgao tơlơi tơnap tap amăng ngă tui; anom bruă ăt gir run pơgiong hlâo kơ lơ 20/6 anai, tañ ƀiă 10 hrơi.

“Bruă kơƀah čuah, ƀing gơmơi hơmâo jao brơi anom bruă bơdjơ̆ nao, kông ang hơdôm să, pơtrut pơsur hơdôm anom bruă, hơdôm anih mă čuah djru ƀu mă kmlai. Ƀing gơñu ăt hluh hăng ngă tui, yua anai lĕ hơdră djru brơi mơnuih ƀun rin. Ƀing khua mua hơmâo khut khăt pơtruh abih bang tơhan kông ang să; pơphô bruă tơl Jơnum min mơnuih ƀôn sang hơdôm boh să pơtrut pơsur mơnuih ƀôn sang, hơdôm anom bruă gum hrŏm djru man pơdong sang brơi hơdôm boh sang anŏ ƀun rin. Pơhmutu, lơm ƀing gơñu kơƀah mơnuih ruh hĭ sang sô, ƀing gơmơi pơkiăo nao mơnuih djru brơi; kơƀah mơnuih man pơdong, ƀing gơmơi ăt pơkiăo nao ƀing tơhan thâo bruă anai kiăng kơ djru brơi”.

Hơdôm boh sang man hơmâo man pơdong giong amăng bơyan hơjan bơi kual Dap kơdư ƀu djơ̆ kơnong jing anih dŏ sir kjăp brơi hơdôm boh sang anŏ ƀun rin đôč ôh mơ̆ ăt pơdah tong ten kơ pran jua ngă bruă “yua kơ mơnuih ƀôn sang” mơng tơhan kông ang. Mơng hơdră djru prong mơng Kơnuk kơna  truh pơ bruă mă tong ten, sit nik mơng Ding jum kông ang hăng kông ang tơring Dak Nông, jơlan hơdră ruh pơkra glăi sang tơ̆i phŏ, sang dŏ jang jai hơmâo ngă lar hyu pran khăp pap, ngă bơngač pran đăo gơnang nao tơlơi hơdip kơñ pơgi hơđong hăng hiam klă ƀiă brơi neh met wa kual ataih, asuek, kual giăm guai. Rĭm boh geč, rĭm boh sang ƀu djơ̆ man pơdang hăng čuah pơtâo đôč ôh mơ̆ ăt hăng pran khăp pap, tơlơi gơgrong hăng tơlơi gir run gum hrŏm mơnuih ƀôn sang amăng pơhrŏ trun ƀun rin, hơđong tơlơi hơdip mơda. /.