Tui hăng hră lăi pơthâo, hơmâo 205 rơbâo boh sang tơ̆i, sang phŏ dưi djru man pơdong glăi phrâo. Biă mă ñu, 21 boh tơring čar, ƀôn prong ƀu hơmâo sang tơ̆i, sang phŏ dơ̆ng tah. Kiăng pơđĭ tui boh tŭ yua dưi ngă laih hăng čơkă mơak tal 80 thun hrơi Hơkrŭ blan čơpăn hăng hrơi akŏ pơdong kơnuk kơna lŏn ia lơ 2/9, khua dêh čar pơtrun hiăp djop sang bruă hrŏm hăng djop gong gai plơi pla kơtưn git gai hăng pok pơhai kơtang hloh bruă ngă bơkơtưn nao rai “Gum hrŏm lŏm lui sang tơ̆i, sang phŏ amăng dêh čar giong amăng thun 2025”.

Tơhnal pơkă phun ngă giong hĭ bruă lŏm lui sang tơ̆i, sang phŏ khom djơ̆ 6 mơta tơlơi rơđah, djơ̆ pô, djơ̆ bruă, djơ̆ mơnuih glăm ba, djơ̆ tơlơi dưi, djơ̆ hrơi blan pơkă hăng djơ̆ boh tơhnal ngă hrŏm hăng 4 mơta tơlơi tơpă lăi biă, ngă sit, tŭ yua biă, mơnuih ƀôn sang ƀun rin sit nik tŭ mă tơlơi djru.