Amăng mông ngă lơphet, pơ ala Kơnuk kơna Lao, ơi Lếc-lảy Sỉ-vị-lay- Ding kơna Ping gah dêh čar, Khua git gai Ping gah, Khua apăn akŏ tơring čar Sê Kông hơmâo jao Miđai mă bruă mrô I kiăng tŭ yap tơlơi gum pơgôp prong mơng tơring čar Dak Lak amăng bruă pơtrut tơlơi rô nao rai giang mah yôm phăn kơplah wah dua boh dêh čar. Ƀrô tal anai tơring čar Dak Lak hăng gong gai tơring čar Sê Kông ăt kĭ hră pioh hơdor ngă hrŏm rơwang thun 2025-2030.

Khua git gai Ping gah tơring čar Dak Lak ơi Nguyễn Đình Trung pơdah tơlơi pơ-ư ang, bơni Kơnuk kơna hăng mơnuih ƀôn sang Lao, laih dong ƀuăn tŏ tui hơkrŭ, pơđĭ kyar tơlơi rô nao rai ngă hrŏm tŭ yua, hơđong kjăp. Khua mua tơring čar ăt rơkâo hơdôm anom bruă bơdjơ̆ nao ngă tui hơdôm boh tơhnal ngă hrŏm, kơtưn pơbưp nao rai mơnuih ƀôn sang hăng ngă tui pran gơgrong mơng khul grup, anom bơwih ƀong sĭ mơdrô dua bơnah.