Ƀơi mông jôk atâo, Khua pơ ala mơnuih ƀôn sang dêh čar ơi Trần Thanh Mẫn hrŏm hăng khul khua nao dưm bơnga, pioh sa mơnit rơngôt kơ sa čô gơyut mơ̆ng Ping gah, Kơnuk kơna hăng mơnuih ƀôn sang Việt Nam. Pơ ala kơ khua mua Việt Nam, Khua pơ ala mơnuih ƀôn sang rơngôt hrŏm hăng Ping gah, Kơnuk kơna, Ƀirô khua pơ ala mơnuih ƀôn sang, mơnuih ƀôn sang čar Lao hrŏm hăng sang anŏ rơgŏm ơi Saysomphone Phomvihane - Khua pơ ala mơnuih ƀôn sang dêh čar.

Ƀrô tal anai, ơi Trần Thanh Mẫn pioh mông bưp Khua ping gah, Khua mir sir dêh čar Lao ơi Thongloun Sisoulith. Dua bơnah pơsit, hơmâo bruă hơget tŭ mơn, dua Ping gah, dua Kơnuk kơna hăng mơnuih ƀôn sang dua boh dêh čar amra bong kjăp, bơbôr tui tơlơi rô nao rai giăng mah pŭ ƀăn, gum pơgôp yom pơphăn plah wah Việt Nam - Lao hăng pơtrut ngă tui truh rơnuk tơdơi dong.