Lăng yom bruă mă pơtom hiăp tơdơi kơ tal jơnum prong ruah khua ping gah hơmâo ngă lu boh tơhnal tŭ yua hiam, Khua ping gah, Khua mir sir pơtrun hiăp kơ Khul khua mua git gai khom pơđĭ tui anŏ gơgrong ba pơpha bruă yom, djơ̆ lăp, pơsir tŭ yua hơdôm tơlơi pơprong gah anom bruă. Sang bruă pô git gai phun lĕ Ding jum pơtom hiăp, dưi tŭ mă bruă jao ngă pơgiong hĭ hơdôm tơlơi pơtrun anăp nao “6 mơta rơđah”, rơđah pô,  rơđah bruă, rơđah hrơi mông, rơđah bruă glăm ba, rơđah gơnam pơjing rai, rơđah tơlơi dưi.

Kơ bruă ngă ƀơi anăp mơta, kiăng pơtum nao amăng 6 blan rơnuč thun 2026, Khua ping gah, khua mir sir pơčrâo brơi tong ten, khom ngă giong tañ hră pơtrun jing atur pioh kơ Khul ngă bruă tŭ ư hrŏm sa jơlan, tŭ yua: jao kơ Khul khua mua git gai bruă anai ngă hrŏm Ding jum Tơlơi phiăn, Ding jum wai lăng tuh tia hăng sĭ mơdrô, ƀing khua mua djop ding jum, anom bruă, tơring čar, ƀôn prong brơi jŭ yap glăi abih laih anun pơphun ngă tui tum teč djop hră pơkôl pơkă, bruă ngă hrŏm ƀơi jar kmar, tơlơi bơtŭ ư yom; pơphun jơnum pơƀut bruă mă 1 thun ngă tui Hră pơtrun 59; prăp lui akŏ pơdong bruă mă pơtom hiăp djop mơta hlom bom hăng pơđĭ nao amăng rơnuk dlông tui hăng phrâo hloh.