Mơguah kơnôl 1/7, git gai Jơnum đơ đam dêh čar tum pơƀut glăi bruă ngă tui gong gai 3 gưl, Khua ping gah, Khua mir sir ơi Tô Lâm kiăng ngă pơgiong tơlơi phiăn, pơtrut kah pơpha gưl ngă bruă, jao bruă nao hrŏm hăng krăo lăng tơlơi ngă khua, tơlơi dưi pơsir bruă, akŏ pơdong khul ngă khua djơ̆ hăng tơlơi kiăng, pơhlom gong gai phrâo mă bruă klă, tŭ yua, bơwih brơi mơnuih ƀôn sang hăng sang bruă mơdrô klă hloh. Khua ping gah, Khua mir sir pơsit, tơlơi pơtrun dăp glăi, ngă hơbôt anom bruă kơđi čar jing bruă lăp djơ̆, khŏm kiăng ƀơ̆i yơh, laih anun yom biă hăng jơlan đĭ kyar lŏn ia.

Pơ anăp dong, kiăng lăng glăi, čih pơgiong abih bang tơlơi phiăn, pơhlom djơ̆ hrŏm, rơđah rơđông, gêh găl kơ bruă ngă tui ƀơi 3 gưl. Ping gah khŏm git gai hăng jơlan ngă bruă, hăng tơlơi phiăn, hăng bruă jao kơ ƀing khua, hăng bruă pel ĕp, krăp lăng, pơtŏng glăi boh than hơmâo ngă. Khŏm pơhlom brơi tơlơi git gai abih bang mơ̆ng Ping gah, samơ̆ ƀu ngă pơ ala brơi, ƀu ngă tơdu, ƀu tek nao ôh bruă ƀu kiăng đơi amăng bruă hơmâo jao kơ djŏp anom bruă kơnuk kơna, Jơnum min djŏp djuai ania mơnuih mơnam hăng hơdôm khul grup kơđi čar - mơnuih mơnam.