Hà Nội hơmâo tŭ mă lu boh tơhnal hiam klă hăng rơnoh GRDP đĭ 8,22%, prăk duh jia pơhrui glăi kơ kơnuk kơna truh 404.000 klai, prăk ba yua tuh pơ alin kơ bruă čar rơbêh 63.000 klai.

Bơni kơ hơdôm boh tơhnal, tơlơi gir run mơ̆ng ƀôn prong amăng bruă ngă pơgiong tơlơi pơkă, bruă pơtrun, brơi pơđĭ kyar atur jơlan glông, pơblih hơdră ngă hră pơar hăng pơphun brơi anih pơđĭ kyar prong hloh, Khua ping gah, khua mir sir ơi Tô Lâm rơkâo kơ Hà Nội ăt pơtum nao bruă mă phun amăng 6 blan rơnuč thun, lăng kơ rơnoh pơđĭ kyar dua mrô jing bruă mă phun amăng kơđi čar yom hloh. Rơđah biă mă ñu, Hà Nội khom pơjing rai yak rơbat bruă mă pơblih kơtang hloh ba yua boh thâo ia rơgơi, pơblih pơčeh phrâo yua mrô hăng pơhrăm mơnuih mă bruă thâo rơgơi. Hà Nội khom ba akŏ amăng bruă akŏ pơdong atur tơlơi bơwih ƀong huă kơnang kơ tơlơi thâo ia rơgơi, djă pioh mrô hăng pơčeh phrâo, pơtrut hmar ngă djơ̆, tong ten pơtruh nao rai ba yua mrô rơnoh bơwih brơi kơ bruă git gai wai lăng, lăi lui hlâo rơnoh pơđĭ kyar, krăp lăng tuh pơ alin kơ bruă čar, wai lăng lŏn glai, pơsir hră pơar hăng pơhlom tơlơi hơdip mơda mơnuih mơnam hơđong.