Anai lĕ tal nao čuă blung a mơ̆ng khua mua pơprong kơnuk kơna Việt Nam truh pơ dêh čar New Zealand, tơdơi kơ dua bơnah dêh čar sit nik pơđĭ tui bruă ngă pŭ ƀăn dua bơnah jing Bơnah ngă hrŏm yom phara amăng thun 2025 ƀrô hơdor glăi 50 thun akŏ pơjing bruă pơtom hiăp, lơ̆m bruă ngă giăng mah dua bơnah ăt glăk pơđĭ kyar hiam klă, hơđong kơnang kơ tơlơi đăo kơnang nao rai gah kơđi čar laih anun pran jua đăo tong ten plah wah dua bơnah jai hrơi dưi kơjăp hloh.

Tal nao čuă jơmư anai, kiăng lăi pơtong jơlan hơdră sa hnơ̆ng mơ̆ng Việt Nam, lăng kơ tơlơi ngă giăng mah hăng New Zealand lĕ sa bơnah klă hiam, lu anŏ gêh găl amăng kual Dơnung ia rơsĭ Thái Bình Dương, laih dơ̆ng sa gru kơnăl yom hloh, ba tơlơi ngă giăng mah yom phara plah wah Việt Nam hăng New Zealand pơđĭ kyar kơtang, tŭ yua sit nik hăng ba glăi boh tơhnal lu hloh amăng črăn phrâo. Him lăng amăng 2 hrơi, khua ping gah, khua mir sir ơi Tô Lâm amra bơkơtuai hăng khua apăn akŏ dêh čar New Zealand, Cindy Kiro; bơkơtuai hăng khua dêh čar, ơi Christopher Luoxon; bưp khua git gai pơ ala mơnuih ƀôn sang dêh čar New Zealand; laih anun amra nao jơnum hăng đĭ pơhiăp amăng mông jơnum pơtô hrăm gưl prong hăng pơtô hrăm bruă mă plah wah Việt Nam-New Zealand; bưp ƀing khua mua, mơnuih mă bruă amăng sang bruă khua anih jưh pơ ala hăng mơnuih ƀôn sang Việt Nam ƀơi dêh čar New Zealand.