Bơni hơ-ơč kơ hơdôm ƀing khua anih jưh pơ ala hơdôm dêh čar rai mă bruă amăng rơwang bruă phrâo, Khua ping gah, khua mir sir lăi pơtong, Việt Nam lăng yom na nao tơlơi ngă giăng mah, gum hrŏm hăng hơdôm dêh čar, čang rơmang pơtrut ngă hrŏm, ba tơlơi ngă giăng mah pŭ ƀăn jai hrơi pơđĭ kyar hloh, tŭ yua amăng djop mơta bruă.

Hơdôm mông tŭ jum anun, Khua ping gah, khua mir sir rơkâo ƀing khua anih jưh pơ ala ngă pô pơtruh brơi bruă pơblih khul khua mua hyu čuă jơmư, trư găn, pok pơhư prong tui bruă ngă bơwih ƀong huă sĭ mơdrô, tuh pơ alin, pơtô hrăm, gru grua hiam hăng tơlơi rô nao rai amăng mơnuih ƀôn sang; kơtưn ngă hrŏm pơčrong sai nao rai amăng mông jơnum prong jar kmar amăng kual hăng lu bơnah. Ƀing khua anih jưh pơ ala pơdah pran jua hơ̆k mơak dưi rai mă bruă ƀơi Việt Nam, kiăng djru hrŏm lu hloh amăng bruă ngă kơjăp tui tơlơi giăng mah pŭ ƀăn hăng Việt Nam, kiăng ba tơlơi ngă giăng mah dua bơnah pơđĭ kyar dơlăm hloh kơñ pơgi ni anăp.