Tŏ tui jơlan hơdră bruă mă amăng jơnum lok 5, Khua pơ ala mơnuih ƀon sang dêh čar pioh mông amăng hrơi tom brơi (29/5) kiăng kiăo tui lăng tong ten amăng bruă gum pơgôp, wai lăng hăng mă yua gơnam măi mok, prăk kak amăng bruă pơgang klin Covid-19; ngă tui hơdră bruă, tơlơi phiăn kơ anih anom ia jrao ƀon lan, ia jrao prap tui tlôn. Pơđok hră lăi pơthâo ƀơi anăp Khua pơ ala mơnuih ƀon sang dêh čar, Khua jơnum min mơnuih mơnam mơng Ƀirô Khua pơ ala mơnuih ƀon sang dêh čar, kơ-iăng khua grup krăo lăng mơng Ƀirô Khua pơ ala mơnuih ƀon sang dêh čar Nguyễn Thúy Anh brơi thâo, truh blan 4/2023, grup krăo lăng hơmâo hơdôm hră lăi pơthâo hăng 15.659 pok hră.

Grup krăo lăng brơi thâo, kơ bruă jak iâu gum pơgôp prăk kak pơgang klin, Kơnuk kơna jŭ yap abih bang djru kơ bruă pơgang klin hăng ngă tui hơdră djru mơnuih mơnam amăng rơwang thun 2020-2022 giăm 230.000 klai prăk, amăng anun mơng ngăn drăp lĕ 186.000 klai, dŏ glăi mơng hơdôm anih pơkŏn. Bơdjơ̆ nao bruă blơi kit pơčrang lăng mơng kông ti pơčruih ngăn Việt Á, grup krăo lăng brơi thâo truh akŏ blan 5, tui hră lăi pơthâo mơng Ding jum kông ang, hơdôm anom bruă pel ĕp hơmâo ƀom kiơng 30 bruă ngă soh hăng 107 čô mơnuih.