Tơdơi kơ ngă lơphet čơkă jum, ƀơi sang jơnum prong kơnuk kơna Mông Cổ, ơi Trần Thanh Mẫn hơmâo kĭ anăn amăng hơdrôm hră čih pioh ƀing tuai pơpŭ pơyom hloh. Khua pơ ala mơnuih ƀôn sang dêh čar ta lăi pơtong, tơlơi rô nao rai giăng mah gru grua Việt Nam hăng Mông Cổ yua kơ Khua mir sir Hồ Chí Minh hăng hơdôm gưl khua mua dua bơnah hơmâo akŏ pơjing hăng pơbŭ tui, găn rơgao rơbêh 70 thun laih pơđĭ kyar hiam klă. Biă mă ñu, bruă dua bơnah akŏ pơjing tơlơi rô nao rai tong ten hăng ngă hrŏm lu bruă hloh.

Ơi Trần Thanh Mẫn lăi pơtong, anom bruă khua pơ ala mơnuih ƀôn sang Việt Nam lăng yom hăng amra hrŏm hăng khua mua pơ ala mơnuih ƀôn sang dêh čar Mông Cổ kơtưn pơblih nao rai grup khua mua čuă jơmư trư găn, ngă hrŏm djop jơnum min wai lăng sa mơta bruă tơlơi thâo, khul khua mua ngă giăng mah laih anun ƀing pơ ala thun dŏ hlăk ai; djru ngă kơjăp tui tơlơi đăo kơnang bruă kơđi čar, pơtrut ngă hrŏm bơwih ƀong huă-sĭ mơdrô, tuh pơ alin, gru grua hiam, pơtô hăng pơjuăt laih anun jĕ giăm rô nao rai mơnuih ƀôn sang, yua anŏ tŭ yua kơ mơnuih ƀôn sang dua bơnah, yua tơlơi rơnuk rơnua, hơđong hăng pơđĭ kyar amăng kual hăng amăng rŏng lơ̆n tơnah.